“ბასტი-ბუბუ”-ს დახურვა ემუქრება? – “სასამართლოში უჩივიან”

ბასტი-ბუბუს საქმე სასამართლოს გადაეცა, – ამის შესახებ „ბასტი-ბუბუს“ ხელმძღვანელი, თამარ სხვიტარიძე აცხადებს.

მიზეზი 130 000-ლარიანი იჯარაა, რომლის გადახდასაც ვერ ახერხებენ

„კორონავირუსმა ყველასთან ერთად დააზარალა ბავშვების საყვარელი – ბასტი ბუბუც!

მეათე თვეა, ბავშვები ვერ დადიან სტუდიაში, საიდანაც აქვს „ბასტი-ბუბუს“ ძირითადი შემოსავალი.

უხელფასოდ არის 60 თანამშრომელი, რომლებიც თავისი საქმის უმაღლესი კლასის სპეციალისტები არიან.

ასევე, „ბასტი ბუბუ“ ვერ იხდის იჯარის თანხას, რომელსაც 30 წლის განმავლობაში პირნათლად უხდიდა სახელმწიფო ორგანიზაცია „ახალგაზრდობის სააგენტოს“!

ბევრი მიწერ-მოწერის, პირადი და ვირტუალური შეხვედრების შემდეგ, ახალგაზრდობის სააგენტომ, გუშინ „ბასტი ბუბუს“ მისცა ერთი კვირის ვადა, რათა დაფაროს 130 000 ლარის ოდენობის იჯარის ვალი, რომელიც კორონავირუსის გამო დაუგროვდა და რომლის გადახდის არანაირი ფინანსური საშუალება „ბასტი ბუბუს“ ამ ეტაპზე არ გააჩნია!

ერთი კვირის შემდეგ, კორონავირუსით დაზარალებული „ბასტი ბუბუს“ საქმე გადაეცემა სასამართლოს!

ეს ის შემთხვევაა, როცა საქმის ვითარება სასაცილოც არის და სატირალიც!

P.S. ნეტავ, როგორ მოიქცევა სახელმწიფო, სასამართლო, ხალხი, რომელსაც უყვარს „ბასტი ბუბუ“ და როგორ ჩაიწერება ეს წლები „ბასტი ბუბუს“ ისტორიაში, რომელიც უკვე საქართველოს ბავშვების საყვარელი 30-წლიანი ბრენდია.

დაველოდოთ საქმის განვითარებას. ვითვალისწინებთ ხალხის დიდ ინტერესს და ამიტომ დღეიდან ამ საქმის განვითარების ყველა დეტალი საჯარო გახდება!“, – წერს სხვიტარიძე.