უკრაინის გარშემო არსებულ დაძაბულობასთან დაკავშირებით, აშშ-ის პრეზიდენტმა ჯო ბაიდენმა, რუს კოლეგა ვლადიმირ პუტინთან სატელეფონო საუბარი გამართა.
ტელეკომპანია „სიენენის“ ცნობით, მხარეთა შორის საუბარი ერთ საათს გაგრძელდა და თბილისის დროით 21:06 საათზე დასრულდა.
თეთრი სახლის განცხადებით, ჯო ბაიდენი პუტინს უკრაინის საზღვრებთან რუსეთის მიერ სამხედრო ესკალაციის მზადების შესახებ ესაუბრა და მკაფიოდ დააფიქსირა, რომ თუკი რუსეთი კიდევ ერთხელ შეიჭრება უკრაინაში, შეერთებული შტატები მოკავშირეებსა და პარტნიორებთან ერთად გადადგამს გადამწყვეტ ნაბიჯებს, რასაც რუსეთისთვის სწრაფი და მძიმე შედეგები მოჰყვება.
“პრეზიდენტმა ბაიდენმა გაუმეორა პუტინს, რომ რუსეთის შეჭრა უკრაინაში გამოიწვევს უამრავი ადამიანის ტანჯვას და შეასუსტებს რუსეთის პოზიციებს.
პრეზიდენტმა ბაიდენმა მკაფიოდ განუცხადა პრეზიდენტ პუტინს, რომ მიუხედავად იმისა, შეერთებული შტატები რჩება დიპლომატიის გზაზე თავის მოკავშირეებთან სრულყოფილი კოორდინაციით, ჩვენ ასევე თანაბრად ვემზადებით განსხვავებული სცენარებისთვისაც“, – ნათქვამია თეთრი სახლის განცხადებაში.
ბაიდენმა და პუტინმა ბოლო სატელეფონო საუბარი 2021 წლის მიწურულს გამართეს. მათ შორის პირველი პირისპირ შეხვედრა კი, 2021 წლის ივნისში გაიმართა.
კომენტარები