“ბაიდენის მოხსნა საპრეზიდენტო მარათონიდან წაადგა უკრაინელებს – ზელენსკიმ ბრწყინვალედ გამოიყენა სიტუაცია” – ზურაბ გურული

-თეთრი სახლი დაუკავშირდა უკრაინელებს, რათა დაადგინოს რუსეთის საზღვრებს მიღმა მიმდინარე სამხედრო ოპერაციის მიზნები – განაცხადა თეთრი სახლის პრეს-მდივანმა- კარინ ჟან-პიერმა.

-ვაშინგტონი მხარს უჭერს უკრაინის მიერ განხორციელებულ ყველა სახის “ბუნებრივად ლოგიკურ მოქმედებას” (common sense actions), რომლებიც საჭიროა რუსეთის შეიარაღებული ძალების შეტევების შესაჩერებლად- ასე დაასრულა გამოსვლა ჟან-პიერმა.

თეთრი სახლის ეს განცხადება უკვე ლოგიკურად ადასტურებს, რომ უკრაინული სამხედრო ოპერაცია სპონტანური ავანტურა კი არა, კარგად დაგეგმილი და მოკავშირეებთან შეთანხმებული სამხედრო ოპერაციაა, ზუსტად განსაზღვრული მიზნებით.

პუტინმა მიიღო ზუსტად რუსულ სტილში გაკეთებული უკრაინული სამხედრო სვლა. გავიხსენოთ ყირიმი და რუსების ცინიკური დუმილი ე.წ. “მწვანე კაცუნებზე”, როდესაც არც მათ მიზნებზე საუბრობდა ვინმე და არც მათ წარმომავლობაზე, სანამ ოპერაცია არ დასრულდა. ახლა კი ვაშინგტონიც ცინიკურად დუმს, ევროპაც და თავად უკრაინაც.

ბაიდენის მოხსნა საპრეზიდენტო მარათონიდან ერთგვარად წაადგა უკრაინელებს. პრეზიდენტის გუნდს აღარაფერი აქვს დასაკარგი და მისი სახელის ფარის ქვეშ შეუძლია მკვეთრი მანევრების ჩატარება. ზელენსკიმ ბრწყინვალედ გამოიყენა სიტუაცია და ისეთ ოპერაციაზე მიიღო მწვანე შუქი, რომელსაც ვაშინგტონი მანამდე არაფრით დათანხმდებოდა.

ვინაიდან და რადგანაც უკრაინას მოკავშირეთა დასტური მიღებული აქვს, ლოგიკურად ეს სამხედრო ოპერაცია უნდა გაფართოვდეს და რუსები კიდევ ბევრი უსიამოვნო სიურპრიზის მოწმენი და მსხვერპლნი გახდებიან.

ეს მოვლენა დიდებული მაგალითია, თუ როგორ უნდა გამოადნოს მოულოდნელად გონებამახვილმა პოლიტიკოსმა ქაოსური მსოფლიო პოლიტიკური სიტუაციიდან თავისი ქვეყნისათვის მაქსიმალური სარგებელი.

საქართველოც ერთგვარი საინტერესო მაგალითია იმისა, თუ როგორ უნდა მოახერხონ უხეირო პოლიტიკანებმა მსოფლიოს ყველაზე რეტროგრადული და წყალწაღებული ქვეყნების ბანაკში თავის ამოყოფა ცივილიზაციისა და ანტი-ცივილიზაციის დაპირისპირებისას.