ერაყის დედაქალაქ ბაღდადში ასობით დემონსტრანტი შვედეთის საელჩოში შეიჭრა. ამის შესახებ ინფორმაციას გამოცემა Reuters ავრცელებს.
აქციის ორგანიზატორები შიიტი სასულიერო პირის, მუკთადა სადრის მხარდამჭერები იყვნენ. მათ სურდათ გაეპროტესტებინათ შვედეთში დაგეგმილი აქცია, რომელზეც ბოლო კვირებში უკვე მეორედ დაგეგმილი იყო ყურანის დაწვა. სადრი, ერაყის ერთ-ერთი ყველაზე გავლენიანი ფიგურა, მეთაურობს ასობით ათას მიმდევარს.
შვედურმა მედიამ გაავრცელა ინფორმაცია, რომ სტოკჰოლმში გასამართ აქციაზე აპირებდნენ ყურანისა და ერაყის დროშის დაწვას და ამის ერთ-ერთი მონაწილე უნდა ყოფილიყო კაცი, რომელმაც ივნისში სტოკჰოლმის მეჩეთის წინ ცეცხლი წაუკიდა ყურანს.
შეჭრის შედეგად საელჩოს არცერთი თანამშრომელი არ დაშავებულა. გავრცელებულ ვიდეოებში ჩანს, რომ კვამლი ამოდიოდა საელჩოს კომპლექსის შენობიდან და დემონსტრანტები იდგნენ მის სახურავზე.
მომხდართან დაკავშირებით განცხადება გაავრცელა შვედეთის საგარეო საქმეთა სამინისტრომ, სადაც უწყება ერაყის ხელისუფლებას მოუწოდებს დაიცვან ქვეყანაში წარმოდგენილი დიპლომატიური მისია.
კომენტარები