საქალაქო სასამართლომ გიორგი ბაჩიაშვილს ბიძინა ივანიშვილისთვის 9000-მდე ბიტკოინის დაბრუნება დააკისრა – აღნიშნული გადაწყვეტილება ცოტა ხნის წინ მოსამართლე ზაალ მარუაშვილმა გამოაცხადა.
9000-მდე ბიტკოინის ფასი დღეის მდგომარეობით დაახლოებით თითქმის მილიარდი დოლარია.
თანაინვესტირების ფონდის ყოფილ მმართველს ბიტკოინების საქმეზე პატიმრობა უკვე მიუსაჯეს, თუმცა რაც გიორგი ბაჩიაშვილმა ქვეყანა დატოვა ივანიშვილმა მის წინააღმდეგ ახალი სარჩელი შეიტანა და ბიტკოინების დაბრუნება მოითხოვა.
მოსამართლემ საქმე დაჩქარებულად განიხილა და გადაწყვეტილება ორ სხდომაში მიიღო.
გადაწყვეტილების თანახმად, ბაჩიაშვილმა ოლიგარქს უკან უნდა დაუბრუნოს აღნიშნული ოდენობის ბიტკოინები, ხოლო თუ არ დააბრუნებს, სამომავლოდ, გადაწყვეტილების აღსრულების მომენტისთვის რა ღირებულაც ექნება ბიტკოინებს, ის თანხა უნდა გადაიხადოს გიორგი ბაჩიაშვილმა.
ასევე, თუ ივანიშვილის მილიარდების ყოფილი მმართველი უარს იტყვის აღნიშნული ბიტკოინების ივანიშვილისთვის დაბრუნებაზე, მას გაუყიდიან ქონებას და კომპანიებს და არა მხოლოდ იმ ქონებას, რომელიც ბაჩიაშვილის სახელზეა, არამედ მისი მშობლების უძრავ და მოძრავ ქონებასაც.
დასაბუთებაში მოსამართლემ თქვა, რომ აღნიშნულ გადაწყვეტილებას საფუძვლად უდევს ის სისხლის სამართლის საქმის გადაწყვეტილება, რომელიც უკვე არის გიორგი ბაჩიაშვილის წინააღმდეგ. ადვოკატის თქმით, განაჩენის გასაჩივრების ვადა ამოწურული არ არის, ამიტომაც, მარუაშვილს საქმე დაჩქარებუალდ არ უნდა განეხილა.
კომენტარები