აჭარაში რეგისტრირებული მოქალაქეები დღეს უმაღლესი საბჭოს 2 მაჟორიტარ დეპუტატს აირჩევენ. აჭარის ავტონომიური რესპუბლიკის უმაღლესი საარჩევნო კომისიის ინფორმაციით, N28 ბათუმის მაჟორიტარულ საარჩევნო ოლქში რეგისტრირებულია 147 292 ამომრჩეველი, ხოლო N30 ხელვაჩაური-ქედა-შუახევი-ხულოს მაჟორიტარულ საარჩევნო ოლქში 96 760 ამომრჩეველი.
N28 მაჟორიტარულ ოლქში მოსახლეობას არჩევანის გაკეთება „ქართული ოცნების“ კანდიდატს, ტიტე აროშიძესა და „ნაციონალური მოძრაობის“ წარმომადგენელ გიორგი კირთაძეს შორის მოუწევს, N30 მაჟორიტარულ ოლქში კი ამომრჩევლები საკუთარ არჩევანს გია აბულაძესა („ნაციონალური მოძრაობა“) და ფრიდონ ფუტკარაძეს („ქართული ოცნება“) შორის გააკეთებენ. თუმცა „ნაციონალური მოძრაობა“ ბოიკოტის რეჟიმშია და მეორე ტურში არ მონაწილეობს. ამის მიუხედავად მათი წარმომადგენლების გვარები საარჩევნო ბიულეტენში მაინც დარჩება.
აჭარის საკანონმდებლო ორგანოში 21 დეპუტატია. 18-ს მოსახლეობა პროპორციული წესით, სამს კი მაჟორიტარული წესით ირჩევს. მაჟორიტარული არჩევნების პირველივე ტურში ქობულეთის მაჟორიტარულ ოლქში ხმათა 50.05%-ით „ქართული ოცნების“ კანდიდატმა, ცოტნე ანანიძემ გაიმარჯვა. პროპორციული სისტემით 11 მანდატი „ქართულმა ოცნებამ“, 7 კი „ნაციონალურმა მოძრაობამ“ მოიპოვა.
მაჟორიტარული არჩევნების პირველ ტურში 13 ოლქში „ქართული ოცნების“ კანდიდატებმა გაიმარჯვეს. რაც შეეხება პროპორციულ სისტემას, ცესკოს ინფორმაციით, ბიულეტენების 100% დათვლის შემდეგ შედეგები ასეთია: „ქართული ოცნება“ – 48,22%; „ნაციონალური მოძრაობა – გაერთიანებული ოპოზიცია“ – 27,18%; „ევროპული საქართველო“ – 3.79%; „ლელო“ – 3,16%; „პატრიოტთა ალიანსი“ – 3,14%; „სტრატეგია აღმაშენებელი“ –3,15 %; „გირჩი“ – 2,89%; „ალეკო ელისაშვილი – მოქალაქეები“ – 1,33%; „ლეიბორისტული პარტია“ – 1%. დანარჩენმა პარტიებმა ამომრჩეველთა ხმების ერთ პროცენტზე ნაკლები აქვთ.
ოპოზიცია არჩევნებს გაყალბებულს უწოდებს და მეორე ტურში მონაწილეობაზე უარს აცხადებს.
საერთაშორისო დამკვირვებლებმა დაადასტურეს, რომ საქართველოში საპარლამენტო არჩევნებზე ფუნდამენტური თავისუფლებები და პროცედურების უმეტესობა დაცული იყო.
კომენტარები