ნიუ-იორკის სამხრეთ ოლქის ფედერალურმა მოსამართლემ ჟანეტ ვარგასმა გააუქმა ტრამპის ადმინისტრაციის პოლიტიკა, რომლის საფუძველზეც 75 ქვეყნის მოქალაქეებისთვის საიმიგრაციო ვიზების გაცემა შეჩერებული იყო. შეზღუდვა საქართველოსაც ეხებოდა.
მოსამართლემ დაადგინა, რომ სახელმწიფო დეპარტამენტის პოლიტიკა კანონს ეწინააღმდეგებოდა და სახელმწიფო მდივან მარკო რუბიოს უფლებამოსილების ფარგლებს სცდებოდა. გადაწყვეტილებაში უარყოფილია ადმინისტრაციის არგუმენტიც, რომლის მიხედვითაც ამ ქვეყნებიდან ჩასული მიგრანტები შესაძლოა სახელმწიფო დახმარებაზე დამოკიდებული გამხდარიყვნენ.
სასამართლოს გადაწყვეტილება ასევე ეხება იმ ადამიანებს, რომლებსაც ვიზაზე უარი მხოლოდ აღნიშნული პოლიტიკის საფუძველზე უთხრეს. შედეგად, შესაძლოა ათასობით ადრე უარყოფილი განაცხადის ხელახლა განხილვა გახდეს საჭირო.
შეზღუდვა 21 იანვრიდან მოქმედებდა და 75 ქვეყანას, მათ შორის საქართველოს, მოიცავდა.
ტრამპის ადმინისტრაციას ფედერალური მოსამართლის გადაწყვეტილების გასაჩივრება შეუძლია, ამიტომ სასამართლო დავა შესაძლოა გაგრძელდეს.
კომენტარები