“ასეთი ფულისმომტანი ადამიანი როგორ მოიცილა ამ არხმა? – მთავარი მოქმედი პირი ამერიკული სასამართლოა” – გოცირიძე

თუ ასეთი საზიზღარი ტიპია, ამოდენა ხელფასს რატომ უხდიანო, იკითხავთ ალბათ? იმიტომ, რომ ბევრი მაყურერებელი ჰყავს, 5 მილიონამდე ადამიანი უყურებს ყოველ საღამოს. ბნელები და მარშისტები მარტო ჩვენთან კი არ არიან, ამერიკელებსაც თავიანთი ჰყავთ.

კი მაგრამ, ასეთი ფულისმომტანი ადამიანი როგორ მოიცილა ამ არხმა? იმიტომ, რომ ოქროს კვერცხის მდებელი ქათამი ზარალიანი გახდა, კოლოსალური ზიანი მიაყენა ამ ცნობილ ტელეარხს.

ამ ამბავში ვინაა მთავარი მოქმედი პირი, ტაკერი? ტელევიზია? ის ბიზნესკომპანია? (გაიგებთ ქვემოთ, თუ რომელი). არა, მთავარი მოქმედი პირი ამერიკული სასამართლოა, რომელიც საბოლოოდ ყველას უჩენს თავის ადგილს.

“ფოქსნიუსი” და ტაკერ კარლსონი წლებია გაიძახის, რომ ტრამპს არჩევნები გაუყალბეს, რომ ბაიდენმა მანიპულაციებით გაიმარჯვა და ეს მოხდა ელექტრონული ხმისმთვლელი მანქანების მეშვეობით, რომელიც თურმე ისე ყოფილა დაპროგრამებული, რომ ბიულეტენებს ტრამპის საწინააღმდეგოდ ითვლიდა. ჰო და ამოუვიდა ყელში ამათი ჩხავილი ამ მანქანების მწარმოებელ კომპანიას, იჩივლა სასამართლოში, გამართლდა და ამ ტელეარხს ცილისწამებისათვის დაეკისრა 787 მილიონი დოლარის ოდენობის ჯარიმის გადახდა.

სამართალმა პური ჭამა.

ტაკერას კარგა ბლომად ფული აქვს და მშიერი არ დარჩება, მაგრამ ეს ისტორია კარგი მაგალითია ჩვენი დღევანდელი კონტექსტისათვის-აი მაგალითი, თუ რას ნიშნავს დამოუკიდებელი სასამართლო და თუ რატომ გვირჩევენ ჩვენი მეგობრები, რომ ამ საქმეს მივხედოთ პირველ რიგში.

დამოუკიდებელი სასამართლო, დამოუკიდებელი არჩევნები, დამოუკიდებელი მედია კერძო საკუთრებაზე დაფუძნებული სისტემის ფუნდამენტია. ამ შემთხვევაში სწორედ სასამართლომ დაამყარა ბალანსი სისტემაში წარმოქმნილი გადახრის წონასწორობაში მოსაყვანად.”