საქართველოში, ამ ეტაპზე, კორონავირუსით მესამედ ინფიცირება ლაბორატორიულად დადასტურებული არ არის, ამის შესახებ თბილისის ინფექციური საავადმყოფოს ხელმძღვანელმა, თენგიზ ცერცვაძემ „პირველ არხთან” განაცხადა.
ცერცვაძემ, კორონავირუსით მესამედ დაინფიცირების შემთხვევების შესახებ გავრცელებულ ინფორმაციაზე დამატებით განმარტება გააკეთა და განაცხადა, რომ საქმე ეხება სავარაუდო შემთხვევებს.
„კოვიდი მეორედ თუ დადასტურდა, თეორიულად, არსებობს მექანიზმი, რომ ადამიანი მესამედაც დაინფიცირდეს. მეორედ რეინფიცირება ნიშნავს, რომ პირველმა ინფექციამ პაციენტს იმუნიტეტი არ დაუტოვა, ან ის განსხვავებული შტამით დაინფიცირდა. თუ არსებობს მეორედ რეინფიცირების შემთხვევები და ასეთები ნამდვილად არსებობს, იგივე მექანიზმით, მესამედ დაინფიცირებასაც წინ არაფერი უდგას“, – განაცხადა ცერცვაძემ.
მისი განმარტებით, კოვიდგადატანილის, მით უფრო თუ მას ვირუსი ორჯერ აქვს მოხდილი და თან ვაქცინირებულია, ხელახლა დაინფიცირების საფრთხე გაცილებით ნაკლებია. თუმცა, ცერცვაძის განცხადებით, პრაქტიკა აჩვენებს, რომ არც ვაქცინირება, არც ვირუსის მოხდა პლუს აცრა არაა ასპროცენტიანი გარანტია, რომ ადამიანი არ დაინფიცირდება, მაგრამ დაავადების მიმდინარეობა ბევრად მსუბუქი იქნება.
ამის გათვალისწინებით, თბილისის ინფექციური საავადმყოფოს ხელმძღვანელი ამ კატეგორიის ადამიანებს მოუწოდებს, პრევენციის ზომებს მიმართონ და პირბადე ატარონ, ვიდრე ქვეყანაში საზოგადოებრივი იმუნიტეტი არ გამომუშავდება.
„კოვიდ-19“-ით მესამედ ინფიცირების შემთხვევების შესახებ ინფექციური კლინიკის ინფექციონისტმა, რევაზ მეჭურჭლიშვილმა განაცხადა. ლაბორატორიულად დადასტურებული მსგავსი შემთხვევების დაფიქსირება „პირველ არხთან” საუბარში არ დაადასტურა დაავადებათა კონტროლის ეროვნული ცენტრის ხელმძღვანელის მოადგილემ, პაატა იმნაძემ.
კომენტარები