მმართველ გუნდში „გორბის“ ბოლო კვლევის შედეგებს აფასებენ. პარლამენტის თავმჯდომარის მოადგილე არჩილ თალაკვაძემ საარჩევნო უბნებზე ამომრჩევლის აქტივობის მნიშვნელობას გაუსვა ხაზი.
„60% არის რეალური მხარდაჭერა და ახლა მთავარია, რომ თითოეული ჩვენი თანამოქალაქე მოვიდეს არჩევნებზე და ნახევარი საათი დაუთმოს თავისი ქვეყნის მომავალს. „ქართულ ოცნებას“ შეუძლია აიღოს მშვიდობიან, განვითარებულ ევროპულ მომავალზე პასუხისმგებლობა და ეს გააკეთოს მოქალაქეებთან ერთად“, – განაცხადა თალაკვაძემ.
ტელეკომპანია „იმედის“ დაკვეთით საზოგადოებრივი აზრისა და ბიზნესის კვლევის საერთაშორისო ცენტრის, „გორბის“ მიერ ჩატარებული კვლევის თანახმად, კითხვაზე, ხვალ რომ საპარლამენტო არჩევნები ტარდებოდეს, „ქართული ოცნება“ ხმათა 60,2%-ს მიიღებდა.
ტელეკომპანია „იმედის“ დაკვეთით „გორბიმ“ საზოგადოებრივი აზრის კვლევა ქვეყნის მასშტაბით პირისპირი ინტერვიუს მეთოდის გამოყენებით ჩაატარა. საველე სამუშაოები მიმდინარეობდა 12 ოქტომბრიდან 21 ოქტომბრის პერიოდში. გამოიკითხა 1704 ადამიანი. ცდომილების ზღვარი +/- 3 პროცენტია. პოლიტიკური პარტიების პოზიციას უკვე ხვალ გაგაცნობთ.
კომენტარები