“არჩევნებზე გამოვეკიდოთ “პოლის” ჯოხით… ისე დაგმალოს ღმერთმა, არ გამოგაჩინოს” – აქცია ბათუმში

ბათუმში ამ წუთებში სხვადასხვა სოციალური პრობლემის მქონე მოქალაქეები ერთობლივ საპროტესტო აქციას მართავენ. ისინი დღეს ბათუმის ცენტრში შეიკრიბნენ, იყვნენ მისულნი აჭარის მთავრობის შენობასთან, შემდგომ იყვნენ აჭარის საზოგადოებრივ მაუწყებელთან და ითხოვდნენ გაშუქებას, შემდგომ მივიდნენ მერიაში, სადაც ყველა კარი დარაზული დახვდათ და ახლა ისევ მიემართებიან აჭარის მთავრობის ადმინისტრაციასთან.

“ესენი რომ მოვლენ არჩევნებზე გამოვეკიდოთ “პოლის” ჯოხით და რაც ხელში მოგვყვება, იმით. მერი არის და თან არ არის. სამივე კარი ჩაგვიკეტა. იმის ნაცვლად, რომ გამოსულიყო და ეკითხა, რა გვიჭირს, რატომ ვდგავართ აქ, დაგვემალა, ისე დაგმალოს ღმერთმა, არ გამოგაჩინოს.” – ამბობს აქციის ერთ–ერთი ორგანიზატორი.

აჭარის მთავრობასთან მისული ხალხი ხედავდა, როგორ იცინოდნენ ფანჯრებიდან ხელისუფლების წარმომადგენლები:

“ფანჯარა შეაღეს და იცინიან – სირცხვილი არაა?”– ამბობს აქციის მონაწილე. 

მერიასთან ვითარება რამდენჯერმე დაიძაბა, რადგან მოქალაქეები, მათ შორის, მხცოვანი ადამიანები, ითხოვნენ ჭიშკრის გახსნას და ამბობდნენ, რომ მერიის დუმილი იყო შეურაცხმყოფელი. ისინი ითხოვნენ, გადაეღო მედიას დაკეტილი, ბოქლომდადებული ჭიშკრები და კითხულობდნენ, სამუშაო საათებში, რატომ არის მერია ხალხისთვის დაკეტილი?

აქციის ორგანიზატორების თქმით, 15 მაისს დიდი აქცია გაიმართება და უკვე ყველა ის ადამიანი გამოვა, ვისაც პრეზენტია აქვს ხელისუფლებასთან. მანამდე კი მოივლიან ხულოს და ქედას და იქაც ადგილზე გაარკვევენ, ვის არ შეუსრულა დაპირება ხელისუფლებამ. 

“მოვედით, გამოდით! ნეტა, არ ესმით? – დაგაყრუათ ღმერთმა!” – აქცია ბათუმში