“არჩევნები გაყალბებულად შეიძლება ჩაითვალოს მხოლოდ ამ შემთხვევაში – ნაბან წყალს ბავშვი არ გადავაყოლოთ” – ხუხაშვილი

პოლიტოლოგი, გია ხუხაშვილი “პალიტრანიუსთან” ამბობს:

“გაუგებარია რა მოხდება არჩევნების დღეს და რა მოხდება პოსტსაარჩევნო პერიოდში. ფაქტია, ესკალაციის ხარისხსი პიკზეა, ზამბარასავითაა მოჭიმული საზოგადოება და ყველას აქვს ძირითადად ნეგატიური მოლოდინები.

რაც შეეხება პოლიტიკურ თუ საზოგადოებრივ ჯგუფებს, აქაც არის აზრთა სხვადასხვაობა და კაკაფონია, მინდა ყველა ამ ჯგუფს ვთხოვო, როგორც არ უნდა განვითარდეს მოვლენები, ნაბან წყალს ბავშვი არ უნდა გადავაყოლოთ. ისეთ ქმედებებს არ უნდა მივმართოთ, რამაც შეიძლება დააზიანოს ქართული სახელმწიფო.

მინდა ვთხოვო საჯარო მოხელეებს, სისტემას. ჩვენ ხომ სისტემის პრობლემა გვაქვს. ამ პროცესში არ შეასრულოთ დანაშაულებრივი დავალებები, რომელბსაც, სავარაუდოდ, ხელისუფლება მათ მიმართ გასცემს. ადრე თუ გვიან, ეს ყველაფერი იშიფრება, საკუთარ შვილებთან, მომავალთან, სინდისთან პასუხისმგებლობას რომ თავი დავანებოთ, შესაძლებელია სისხლის სამართლებრივ დევნაშიც გადავიდეს. ეს განსაკუთრებით ეხებათ კომისიის წევრებს, რომელთაც, ჩემი ვარაუდით, აძლებენ, რომ კანონს მიღმა ქმედებები ჩაიდინონ. მათ, რომც გაუვიდეთ, ამ, შესაძლო დარღვევების ბაზაზე, შეიძლება მოხდეს ქვეყანის არასტაბილურობის საფუძველი და მათივე მომავლის ინტერესები დაზიანდეს.

ჩავეტიოთ ყველა კანონის ფარგლებში, მივიღოთ ის ნება, რასაც ქართველი ხალხი, საბოლოო ჯამი გამოხატავს.

თუ იქნება პროტესტი, პროტესტსაც უნდა ჰქონდეს თავისი ფორმა, შინაარსი და დარღვევების შესახებ კომპეტენტურად დაიდოს საბრალდებო დასკვნა და არა კონტექსტიდან დაჭრილი, ერთეულოვან შემთხვევებზე აპელირება. არჩევნები გაყალბებულად შეიძლება ჩაითვალოს მხოლოდ იმ შემთხვევაში, თუ გაყალბების მასშტაბი სერიოზულ გავლენას ახდენს საბოლოო შედეგზე. ერთი და ორი პროცენტი, არ არის ის კრიტიკული მასა, რის გამოც შეიძლება ქვეყანაში რისკები გავაჩინოთ. “