„არავითარი ჩაკეტვა არ იქნება არც ბათუმის და არც აჭარის, არაფერია საპანიკო“ – „არ უნდა გავთამამდეთ“

დაავადებათა კონტროლის ეროვნული ცენტრის დირექტორმა ამირან გამყრელიძემ, კითხვას, ჩაიკეტება თუ არა აჭარა და ბათუმი, ასე უპასუხა:

„არავითარი ჩაკეტვა არ იქნება არც ბათუმის და არც აჭარის. მოგეხსენებათ, რომ ეს არ არის შემთხვევების ის რაოდენობა, რომ რაღაც რადიკალური ზომები მივიღოთ. მიმდინარეობს გაფართოებული კვლევები, რომელიც კიდევ უფრო გაფართოვდება.

მთლიანად ქვეყანაში, ისევე როგორც აჭარის რეგიონში, სიტუაცია სრულად კონტროლირებადი და მართვადია, არაფერი საპანიკო და არავითარი განგაშის საფუძველი ჩვენ არ გვაქვს, მაგრამ სიტუაცია საყურადღებოა, ეს სიტუაცია პროგნოზირებადი იყო” – განაცხადა ამირან გამყრელიძემ.

თბილისის ინფექციური საავადმყოფოს ბოქსირებული განყოფილების უფროსის მარინა ენდელაძის განცხადებით კი, რეკომენდაციების შესრულების შემთხვევაში, განსაკუთრებული რეგულაციების შემოღება საჭირო არ გახდება.

„თუ ჩვენ დავიცავთ ყველაფერს და არ გავთამამდებით ისე, როგორც უკვე გავთამამდით, ვფიქრობ, არ იქნება საჭირო დამატებითი, განსაკუთრებული რეგულაციების შემოღება”, – განაცხადა ენდელაძემ.

შეგახსენებთ, რომ 5 სექტემბერს ინფიცირების 25 ახალი შემთხვევა გამოვლინდა. მარინა ენდელაძის განმარტებით: „25 ახალ პაციენტიდან 9 არის „დონას კლასტერიდან”, 8 არის ინფიცირებულებთან კონტაქტი, 3 არის იმპორტირებული შემთხვევა და აქედან 1 არის სატვირთო ავტომობილის მძღოლი, სამის ინფიცირების წყარო აჭარაში მოგზაურობას უკავშირდება, ერთი არის რუსთავის „ავერსის” თანამშრომელი და მხოლოდ ერთი შემთხვევა გვაქვს, რომელზეც დადასტურებული არ არის წყარო და გრძელდება ეპიდემიოლოგიური კვლევები. გამოჯანმრთელებულების რაოდენობა 8-ით გაიზარდა”.