“არანარი ერთობა არ გამოვა “ენმ”–თან ერთად”. სასურველიც არაა” – მერაბ მეტრეველი

1) არ გამოვა იმიტომ, რომ დღეს ენმ არის ერთადერთი პარტია, რომელსაც ყავს მძიმე წონიანი ლიდერი მიშას სახით. სხვა არცერთ პარტიას მიახლოებული წონის ფალავანიც კი არ ყავს. შესაბამისად, როდესაც გაერთიანებაში არის ერთი სპილო და სხვა შედარებით მცირე ზომის ცხოველი, ამ სპილოს რაც უნდა სთხოვო ცოტა დაიხარეო, მაინც სპილოდ დარჩება და თანბრობა, თანასწორობა პარიტეტი არანაირად არ გამოვა; მით უმეტეს, თუ სპილოც დიდად არ ამჟღავნებს თავის დახრის და თავის დამცრობის სურვილს.

2) სასურველი არაა იმიტომ, რომ რამდენადაც მაღალია ენმ-ს ლიდერის წონა სხვა ლიდერებთან შედარებით, იმდენად მაღალია მის მიმართ სიძულვილიც. ანუ სხვა პარტიების ლიდერებს პიროვნულად იმდენი მომხრე არ ყავთ, რამდენიც მიშას, მაგრამ მათ არც იმდენი მოძულე ყავთ. მათ აქვთ შანსი ოპოზიციას ახალი ამომრჩეველი შემატონ, მაგრამ მიშასთან კოლაბორაცია ამ შანს, მთლიანად თუ არ კლავს, ძალიან ამცირებს.

შესაბამისად, რადგან ასეთი სპეციფიკური სიტუაცია გვაქვს, გამოსავალიც არის მოსაძებნი სპეციფიკური. ოპოზიციამ უნდა იხელმძღვანელოს არა პრინციპით, – ძალა ერთობაშია, – არამედ – პრონციპით: ძალა ორობაშია

ანუ უნდა გაკეთდეს ორი ცენტრი. ერთ ცენტრში იქნება ან მარტო ენმ, ან ენმ და ის პარტიები, რომლებიც მზად არიან მიშა აღიარონ ლიდერად, ხოლო მეორე გაერთიანებაში იქნებიან ის პარტიები, რომლებსაც არ სურთ მიშა იყოს მათი ლიდერი.