“არა იმიტომ, რომ ჩემი შვილი დღეს მოკვდა” – გიგა ოთხოზორიას დედის კომენტარი რუსულ თვითმფრინავებზე თბილისში

დღეს, 19 მაისს 7 წელი შესრულდა აფხაზეთის საოკუპაციო ხაზთან საქართველოს მოქალაქის, 30 წლის გიგა ოთხოზორიას მკვლელობიდან.

გიგა ოთხოზორიას დედა, ჯულიეტა ჭანტურია ამბობს:

“ამ 7 წლის განმავლობაში იმედით ვცოცხლობ ყოველთვის. დღეს კიდევ ჩემი შვილის მკვლელობის საკითხი რომ წამოვწიო წინ, მერიდება, ჩემი ქართველი ხალხის მერიდება. მიუხედავად იმისა, რომ მე ვერანაირ სამართალს ვერ ვხედავ და ახლა რატომღაც მგონია, რომ უფრო გაჭირდება სამართლის ნახვა და მიღწევა. მე დღეს ჩემ შვილთან ერთად დავტირი ყველა იმ ახალგაზრდას, რომელიც სამშობლოს სიყვარულს შეეწირა. ვინც იბრძოლა თავისი სამშობლოსთვის. გმირები გახდნენ პირტიტველა ბიჭები და ამ დროს, ცოტა გასაკვირია მე მგონი, რომ რუსებს ზარ-ზეიმით დავხვდით, ეს არის, მეტი არაფერი.

ჩემი შვილიც ამ ქვეყნის შვილი იყო და უყვარდა, მას ნამდვილად უყვარდა თავისი სამშობლო და თავის სიტყვებს, რომელიც მან თქვა, რომ ჩემ მიწაზე დგახართ და ამდენს ქართველ ადამიანს როგორ უბედავთ, როგორ ბედავთ, რომ ქართველი ადამიანის პირადობის მოწმობას ფეხი დააბიჯოო, ამას ემსხვერპლა ჩემი შვილი, ასე რომ, დღეს, მართლა დღეს, რომ პირველად ჩამოვაფრენთ ამ რუსეთის თვითმფრინავს, ალბათ მას დელეგაცია ჩამოჰყვება, რომელსაც ალბათ ჩვენები დახვდებიან, რატომღაც მგონია, რომ ცოტა უხერხულობას უნდა უქმნიდეთ, არა იმიტომ რომ ჩემი შვილი დღეს მოკვდა, არა საერთოდ, ვინც დადებითად ჩავთვლით, რომ ეს მოვლენა კარგია, მაგათთვის მე მგონი ცოტა უხერხულობის მომენტი უნდა ჰქონდეთ ყოველ შემთხვევაში თუ არ აქვთ”,

წყარო – მთავარი არხი

ცნობისთვის, ოკუპირებული გალის რაიონიდან დევნილი გიგა ოთხოზორია, რომელიც ზუგდიდში ცხოვრობდა, 2016 წელს, ცეცხლსასროლი იარაღით მოკლა ე.წ. მესაზღვრემ რაშიდ კანჯი ოღლიმ.