უკრაინის მხარდასაჭერად თეთრ სახლთან აქცია გაიმართა. მოქალაქეებმა ხელისუფლებისგან რუსული ნავთობის იმპორტის აკრძალვა და უკრაინაში ცის ჩაკეტვა მოითხოვეს.
თეთრ სახლთან გამართულ აქციაზე, დღეს უკრაინის მხარდასაჭერად ამერიკის მთავრობის ახლანდელი და ყოფილი მაღალჩინოსნები მივიდნენ. მათ შორის იყო სენატორი რობ პორტმანი, რომელმაც მოსთხოვა ადმინისტრაციას, სასწრაფოდ შეაჩეროს ნავთობპროდუქტების იმპორტი რუსეთიდან. სენატორმა, ასევე, მოითხოვა აღმოსავლეთ ევროპის ქვეყნებმა გადასცენ მათ ხელთ არსებული რუსული წარმოების ავიაცია უკრაინას, შეერთებული შტატების მხრიდან თანამედროვე, ამერიკული თვითმფრინავების გაგზავნის სანაცვლოდ.
“მივმართავ რუს მეთაურებს და ხელისუფლებას მოსკოვში. სხვა არჩევანიც არსებობს. შეწყვიტეთ სისასტიკე, რომელმაც უკვე ათასობით უდანაშაულო სამოქალაქო პირის, ქალის, კაცის და ბავშვის სიცოცხლე შეიწირა. გეუბნებით, რომ მსოფლიო გიყურებთ და ამ სამხედრო დანაშაულებს ვიმახსოვრებთ.
უფრო მეტი უნდა გავაკეთოთ უკრაინის სამხედრო დახმარებისთვის. მეტი იარაღი უნდა გავგზავნოთ, მათ შორის, ანტისატანკო და ანტისაჰაერო საშუალებები. ბოლო დღეებია მოვუწოდებ და პრეზიდენტს წერილიც გავუგზავნე, რომელშიც ორპარტიული მოწოდებაა, იმუშაონ ისეთ ქვეყნებთან, როგორებიც პოლონეთი, რუმინეთი და სლოვაკეთია. მათ აქვთ თვითმფრინავები, რომელთა მართვაც უკრაინელ პილოტებს შეუძლიათ და ეს განსაკუთრებით სჭირდებათ. ჩვენ უნდა შევწყვიტოთ ვლადიმირ პუტინის და მისი ომის მანქანის დაფინანსება. ამისთვის ერთ-ერთი გზაა, არ ვიყიდოთ რუსული ნავთობი და არ გავუგზავნოთ ფული რუსეთს,”-აცხადებს რობ პორტმანი.
აქციაზე მივიდა ამერიკის ადმინისტრაციის ყოფილი წარმომადგენელი, უკრაინის მოლაპარაკების საკითხებში, კურტ ვოკერი, რომელმაც გასულ კვირას მოამზადა რეკომენდაციები ამერიკის მთავრობისთვის, უკრაინის დასახმარებლად.
“როდესაც ჩვენ, მეორე მსოფლიო ომში ჩართვამდე, ბრიტანეთს “ლენდ-ლიზის” პროგრამით ვეხმარებოდით, ჩვენ ამისთვის, ხელშეკრულებით გათვალისწინებული ვალდებულება არ გვქონია. როდესაც ბოსნიის და ერაყის ქურთისტანის თავზე საჰაერო სივრცე ჩავკეტეთ, არც მაშინ გვქონდა ხელშეკრულებით ვალდებულება. ჩვენ მორალური ვალდებულებით ვხელმძღვანელობდით.
სწორედ ამ გზით უნდა ვუყურებდეთ ჩვენს ვალდებულებებს და შესაძლებლობებს, დღეს უკრაინის დასახმარებლად. ჩვენ ვიცნობთ პუტინს. ის ამას წინასწარგანზრახულად აკეთებს. მას უკრაინის განადგურება აქვს გადაწყვეტილი და ის უკრაინით არ გაჩერდება.
ჩვენ უნდა დავუპირისპირდეთ პუტინს. ეს ახლა უნდა გავაკეთოთ, როდესაც გვყავს უკრაინის მთავრობა, უკრაინის არმია, ხალხი უკრაინაში, რომელიც საბრძოლველად მზადაა. ახლაა დრო, ნაბიჯების წინ გადასადგმელად და არა ლოდინი, ვიდრე უფრო მეტი ადამიანი დაიღუპება, დაიტანჯება და ვიდრე ეს უფრო რთული გასაკეთებელი იქნება. იმოქმედეთ ახლა,”-აცხადებს კურტ ვოკერი.
კომენტარები