,,არ თანამშრომლობა მათზე დარტყმაა“ – ხოშტარია და ხაზარაძე-ჯაფარიძე ვერ შეთანხმდნენ

თვითმმართველობის არჩევნებში ოპოზიციის მონაწილეობის/არ მონაწილეობის საკითხზე მსჯელობის ფარგლებში, კოალიცია “ცვლილებისთვის” ლიდერი, ელენე ხოშტარია კოალიცია “ძლიერი საქართველოს” ლიდერებს, მამუკა ხაზარაძეს და ბადრი ჯაფარიძეს შეხვდა.

როგორც ოპოზიციონერმა პოლიტიკოსმა “ტვ პირველის” ეთერში განაცხადა, “ქართული ოცნების” პოლიტიკურ ოპონენტებთან აუდიენცია 2-ჯერ გამართა, თუმცა მხარეები მოცემულ თემასთან დაკავშირებით ერთ პოზიციაზე ვერ შეჯერდნენ:

,,არ თანამშრომლობა მათზე დარტყმაა. არჩევნებში მონაწილეობის მიღება არის აღიარება, რომ თითქოს ამ ქვეყანაში არჩევნები არსებობს და აღიარება იმ ადმინისტრაციების, რომელსაც ჩვენ ვებრძვით. იქნება ეს ცესკო, პარლამენტი თუ სხვა. ეს არის სტრატეგიულად უკან გადადგმული ნაბიჯი, რაც ნიშნავს იმის აღიარებას, რომ პროტესტი არ არის საკმარისი, პროტესტი არ არის ეფექტური, ჩვენი პარტნიორების მხარდაჭერა არ არის ეფექტური. როდესაც ჩვენ ვამბობთ, რომ დასასანქცირებელია სუს-ი, ცესკოს თავმჯდომარე და ა.შ., რანაირად უნდა დავუსაბუთოთ ჩვენს პარტნიორებს, რომ ის უნდა დაასანქციროს, როდესაც მის არჩევნებში იღებ მონაწილეობას. შენ მთელი ამ პერიოდის განმავლობაში სანქციებს ვერ მოითხოვ, რადგან მასთან შედიხარ პოლიტიკურ ურთიერთობებში…

რადგან დისკუსია გაიხსნა, მე მას მივმართე, რომ საჯარო დებატებში დავსხდეთ. მაგრამ ზუსტად ამის პარალელურად, ეგრევე დავურეკე და ორჯერ შევხვდი. თავად გადავდგი ეს ნაბიჯი. ბატონ მამუკას და ბატონ ბადრის შევხვდი. ლელოში ვიყავი მისული. არაფერი განსაკუთრებული ამაში არ არის. ამ საკითხზე ვისაუბრეთ. ერთ პოზიციაზე ვერ მივედით”