სასამართლო სამედიცინო ექსპერტი, მაია ნიკოლეიშვილი, “ალტ-ინფოსთან” პასუხობს ადვოკატ შალვა ხაჭაპურიძის მიერ, მიხეილ სააკაშვილის სასამართლო პროცესზე გაჟღერებულ ფრაზას, რომ წინა ხელისუფლების დროს, რადგან მაია ნიკოლეიშვილი იყო რეჟიმის მიერ გასამართლებული, ეს უკანასკნელი არის სააკაშვილის პირადი მტერი.
მაია ნიკოლეიშვილი:
მე რა თქმა უნდა არ ვარ, როგორ ვიქნები პირადი მტერი, პირადი მტერი როგორც ვიცი, პუტინია, ხო? ამ რანგში ჩემ თავს ვერ ავიყვან, მაგრამ პირადი მტრობა რატომ უნდა მქონდეს – კი, რაც მოხდა მოხდა, პროკურატურამ გამოიძია 2012 წლის შემდეგ და სასამართლომ მიიღო განაჩენი – სრულად ვარ რეაბილიტირებული. აქედან გამომდინარე, მე არანაირი ინტერესი მის მიმართ არა მაქვს, დაკარგული მაქვს ინტერესი.
და მეორე, მე არ შეიძლება პირადი მტერი ვიყო ადამიანის, რომელიც წევს საწოლში. მე ექიმი ვარ და ექიმობა ძალიან ბევრად განსხვავდება, თურმე, ამ შემთხვევაში ადვოკატის ხედვისგან. გამორიცხულია გქონდეს რაიმე პირადი განწყობა, იყო სუბიექტური და ექსპერტიზაში მონაწილეობა მიიღო. არც მაქვს გადაწყვეტილი, არც ვიცი, მივიღებდი, თუ არა, მონაწილეობას ექსპერტიზაში, სერიოზული აწონ-დაწონა დამჭირდებოდა, მაგრამ უცებ ისეთი ტალახი წამოვიდა, გამიკვირდა…
კეთილგანწყობილი სააკაშვილის მიმართ არ ვარ, მე მას არ თანავუგრძნობ, მაგრამ ეს არ ნიშნავს იმას, რომ ვიყო მის მიმართ არაობიექტური და სააკაშვილმა ეს ძალიან კარგად იცის. შეიძლება ადამიანის მიმართ არ მქონდეს პირადი კეთილგანწყობა, მაგრამ როდესაც ექსპერტიზას ატარებ, თუ დათანხმდები, იქ უნდა იყო ობიექტური – რატომ – სისხლის სამართლის კანონმდებლობაზე აწერ ხელს, ყველა დასკვნაზე ვაწერთ ხელს, რომ თუ მე არ გავეცი სწორი დასკვნა, მე წავალ ციხეში. ეს ჩვენთვის ძალიან კარგად არის ცნობილი და ფსიქოლოგიურადაც გამომუშავებული მაქვს, თუ ექსპერტიზას ვატარებ, უნდა ვიყო ობიექტური.
კომენტარები