პროტესტში მონაწილე თეატრალური უნივერსიტეტის სტუდენტთა ნაწილს, უნივერსიტეტის ეთიკის კომისიის გადაწყვეტილებით, სტატუსი შეუწყდა.
სტუდენტური მოძრაობის ინფორმაციით, სტატუსის შეწყვეტაზე შეტყობინება უნივერსიტეტის ათმა სტუდენტმა მიიღო.
მათ აქვთ უფლება, 3 დღის ვადაში რექტორთან გაასაჩივრონ გადაწყვეტილება. რექტორი კი უფლებამოსილია, ერთი თვის ვადაში მიიღოს საბოლოო გადაწყვეტილება.
უნივერსიტეტის ეთიკის კომისია მუდმივმოქმედია და 7 წევრისგან შედგება.
კომისიის წევრები არიან:
- გიორგი მარგველაშვილი – რექტორის მოადგილე;
- გიორგი ფხაკაძე – ადმინისტრაციის ხელმძღვანელის მოადგილე;
- გიორგი სიხარულიძე – დრამის ფაკულტეტის ასოცირებული პროფესორი;
- მერაბ ურუშაძე – კინო-ტელე ფაკულტეტის პროფესორი;
- ქეთევან ტრაპაიძე – სახელოვნებო მეცნიერებების, მედიისა და მენეჯმენტის ფაკულტეტის ასოცირებული პროფესორი;
- ნათია გოგიჩაიშვილი – იურისტი;
- თინათინ ასათიანი – სტუდენტური თვითმმართველობა.
კომისიის ერთ–ერთ წევრს, ქეთევან ტრაპაიძეს, გამოცემა პუბლიკა დაუკავშირდა და მედიის ცნობით, კომისიის წევრმა მათთან საუბარში თქვა, რომ არ სცალია და მნიშველოვანი საქმითაა დაკავებული, მან ვერ თქვა, კოდექსის რა ნორმები დაარღვიეს სტუდენტებმა, და კითხვის დასმის გამო, ჟურნალისტი დევნაშიც კი დაადანაშაულა.
პუბლიკას ჟურნალისტი: უნივერსიტეტის გვერდზე გამოქვეყნებულ პოსტში წარმოდგენილი არ იყო სამართლებრივი დასაბუთება – კონკრეტულად, წესდებით განსაზღვრული რომელი ნორმის დარღვევის გამო შეუწყვიტეთ სტატუსი სტუდენტებს?
ქეთი ტრაპაიძე: ეთიკის კოდექსში ჩამოთვლილი ყველა ის ნორმა, რომელიც გახლდათ დარღვეული.
პუბლიკას ჟურნალისტი: რომელი ნორმის დარღვევა დაადასტურეთ თქვენ? ჩამოგვითვალეთ, მაგალითად, რა დაირღვა, რაც შეწყვეტაზე გადაწყვეტილებას დაედო საფუძვლად…
ქეთი ტრაპაიძე: თქვენ ცდილობთ, მიიღოთ ინფორმაცია, რომელიც სხვებს სურთ და თან არ მცალია, ვერ გიპასუხებთ. ძალიან მნიშვნელოვანი საქმით ვართ დაკავებული.
პუბლიკას ჟურნალისტი: 10 სტუდენტის გარიცხვის გადაწყვეტილება მიიღეთ და ეს საქმე მნიშვნელოვანია…
ქეთი ტრაპაიძე: ამას ჟურნალისტიკა არ ჰქვია, ეს არის დევნა და ამაზეც არსებობს სამართლებრივი პასუხი.
კომენტარები