მზია ამაღლობელის ადვოკატები უკვე თვეებია საქართველოს იუსტიციის უმაღლესი საბჭოდან ითხოვენ ბათუმის საქალაქო სასამართლოს მოსამართლე ნინო სახელაშვილის უმაღლესი იურიდიული განათლების დამადასტურებელ დოკუმენტს. დღეს, 11 ნოემბერს, ქუთაისის სააპელაციო სასამართლოში მიმდინარე სასამართლო პროცესზე ეს საკითხი ადვოკატებმა კიდევ ერთხელ დააყენეს.
ცნობისთვის, ამა წლის 18 მარტს, მოსამართლე სახელაშვილმა თავადვე დაადასტურა, რომ მას სისხლის სამართალში კვალიფიკაცია არ აქვს, მიუხედავად ამის, იგი სწორედ, სისხლის სამართლის საქმეებს განიხილავს. სწორედ ამის შემდეგ დადგა საკითხი, დასტურდება თუ არა საერთოდ მისი იურიდიული განათლება.
მზია ამაღლობელის ადვოკატის, მაია მწარიაშვილის თქმით, მიუხედავად იმისა, რომ მოსამართლის კვალიფიკაციის შესახებ ინფორმაცია საჯაროა, არც იუსტიციის საბჭო და არც საქართველოს ტექნიკური უნივერსიტეტი, ნინო სახელაშვილის იურიდიული განათლების დამადასტურებელ დოკუმენტს არ ასაჯაროებს.
ადვოკატების თქმით, არის თუ არა სახელაშვილი სისხლის სამართალში კვალიფიცირებული, მზია ამაღლობელის დაცვის მხარისთვის უმნიშვნელოვანეს გარემოებას წარმოადგენს.
მაია მწარიაშვილის თქმით, ის ინფორმაცია, რაც იუსტიციის უმაღლესი საბჭოს ვებგვერდზეა გამოქვეყნებული ნინო სახელაშვილის შესახებ, აჩენს კითხვის ნიშნებს იმასთან დაკავშირებით, თუ რამდენად აკმაყოფილებს მისი კვალიფიკაცია საერთო სასამართლოების შესახებ საქართველოს კანონით დადგენილ კრიტერიუმებს.
კომენტარები