საპროტესტო აქცია გაიმართა რიონის ხეობაში – ადგილობრივი მოსახლეობა გიგანტური ჰესის მშენებლობას უკვე 35 დღეა აპროტესტებს. ისინი მშენებლობის შეჩერებასა და კომპანია “ენკას” გასვლას ითხოვენ ტერიტორიიდან.
ამჯერად, ადგილობრივებს დიპლომატიური კორპუსისა და ამერიკის ელჩის კელი დეგნანის დახმარების იმედი აქვთ, რადგან, როგორც თავად აცხადებენ, ხელისუფლებას არ აინტერესებს მოქალაქეების მოთხოვნები:
“ხელისუფლება მთელი ამდენი ხნის განმავლობაში კონტაქტზე არ გამოსულა. გვინდა, რომ ჩვენი არგუმენტირებული პროტესტი ავუხსნათ დიპლომატიურ კორპუსს და მოვუყვეთ, რა ხდება აქ” – განაცხადა აქციის ერთ-ერთმა მონაწილემ.
“საქართველოს ისტორიაში არსებობს მურვან ყრუ, რომელსაც არაფერი ესმოდა და თავისუფლად შეიძლება ამ ხელისუფლებასაც ეწოდოს ყრუ, რადგან არაფერი ესმის”, – აღნიშნა ხელისუფლების ოპონენტმა გოგი წულაიამ.
აქციის მონაწილეებს საყდრისის გადარჩენის კომიტეტის წევრები შეუერთდნენ.
“არ შეწყდება პროტესტი, ვიდრე კომპანია არ დატოვებს ხეობას. მათი განცხადება არის მიუღებელი. ჩვენი ხელისუფლება არის მხარე და არ იცავს მოსახლეობის ინტერესებს, ამიტომ დახმარებისთვის ამერიკის ელჩს მივმართავთ. დაინტერესდეს ჩვენი პროტესტით და მოგვისმინოს. ჩვენ პროტესტს არ შევწყვეტთ” , – განაცხადა აქციის ერთ-ერთმა მონაწილემ ვარლამ გოლეთიანმა.
კომენტარები