ანტონ ჩეჩინი თარჯიმანს და შსს-ს თანამშრომლებს ცრუ მოწმეობაში ამხელს

სინდისის პატიმარი ანტონ ჩეჩინი მის საქმესთან კავშირში მყოფ თარჯიმანს ცრუ მოწმეობასა და უკანონობის თვითმხილველობაში ამხელს.

ჩეჩინი აცხადებს, რომ სწორედ თარჯიმან შორენა ტაბატაძის ცრუ ჩვენებამ განაპირობა მისი დღემდე პატიმრობაში ყოფნა. მისი თქმით, გაუგებარია, როგორ მიიჩნია სასამართლომ ნეიტრალურ მოწმედ ტაბატაძე, რომელიც მეგობრულ ურთიერთობაშია საქმის სხვა მოწმე პოლიციელთან და ამას თავადაც ადასტურებდა პროცესზე.

ჩეჩინი აღნიშნავს, რომ მისი საქმე გაყალბებულ მტკიცებულებებსა და პოლიციის თანამშრომელთა ცრუ ჩვენებებს ეყრდნობა.

“გამარჯობა. მინდა, მადლობა გადავუხადო ყველა ჟურნალისტს ჩემი არც ისე მარტივი საქმის გაშუქებისთვის. 2025 წლის 2 სექტემბერს საშინელება მოხდა, საქალაქო სასამართლოს მოსამართლემ ჯვებე ნაჭყებიამ 8 წელი და 6 თვე მიუსაჯა უდანაშაულო ადამიანს. როგორც იცით, 3 სექტემბერს გაამართლეს ნიკა კაცია, ქართველი აქტივისტი, რომელსაც ჩემი და სხვების მსგავსად, ნარკოტიკები ჩაუდეს. ერთადერთი დიდი განსხვავება გიორგი ახობაძის, თედო აბრამოვის, ნიკა კაციის საქმეებსა და რუსეთის მოქალაქეების: ჩემს, არტემ გრიბულის და ანასტასია ზინოვკინას საქმეებს შორის არის თარჯიმნის არსებობა. მას ჰქვია შორენა ტაბატაძე, სასამართლომ ის “ნეიტრალურ” მოწმედ მიიჩნია, იმის მიუხედავად, რომ ის 2025 წლის 7 ივლისის პროცესზე მობრაძანდა ამავე საქმის მოწმისა და პოლიციის თანამშრომლის ემილ კუპრავას თანხლებით. კითხვაზე: “რატომ მოხვედით ერთად?” უპასუხა: “მეზობლები ვართ და ჩვენ შორის მეგობრული ურთიერთობა არის”. დაკავების დღეს, 2024 წლის 3 დეკემბერს, ის და პოლიციის თანამშრომლები მემუქრებოდნენ, რომ “თუ ოქმს ხელს არ მოვაწერდი, ჩემთვისვე იქნებოდა უარესი, მემუქრებოდა საპატიმრო სასჯელი, შეიძლება, უვადოც კი და “რომ ნარკოტიკებს ვყიდი და ქართველებს ვწამლავ” და თითქოს პოლიციამ “ყველაფერი იცის”. გამოძიების მიმდინარეობის დროს, ვერანაირად დაამტკიცეს გასაღება და ბრალდების მხარემ უარი თქვა ამ ვერსიაზე. ფალსიფიცირებული მტკიცებულებების რაოდენობა საკმარისი არ აღმოჩნდა. არსებობდა იმედი, რომ გამამართლებდნენ, როორც სხვებს, თუმცა თავისუფლების გზაზე შორენა ტაბატაძის ცრუ ჩვენებები გადამეღობა.
ცრუ ჩვენებებს იძლეოდნენ პოლიციის თანამშრომლებიც. ეს განაჩენი რაც შეიძლება მალე უნდა იქნას უკან გაწვეული. ვცდილობ ყველაფრის გაკეთებას, რომ ჩემი უდანაშაულობა დავამტკიცო.
ციხეში მხოლოდ ტვ პირველის და ფორმულას ყურება შემიძლია, ბევრი არ მესმის. იმედი მაქვს, 4 ოქტომბერს ყველაფერი შეიცვლება და უკვე ამ წელს ციხიდან გამოვალ.
გაუმარჯოს დამოუკიდებელ მედიას! გაუმარჯოს დამოუკიდებელ საქართველოს!
თავისუფლება პოლიტპატიმრებს!
07.09.2025
ანტონ ჩეჩინ“