ანდრო ჭიჭინაძის ადვოკატი ამბობს, რომ რომ მსახიობის მობილური აპლიკაცია „ვოთსაფი“, სავარაუდოდ, უკანონოდ გამოიყენა უცნობმა პირმა იმ დროს, როცა ტელეფონი, გამორთული და დალუქული, ექსპერტიზის ბიუროში უნდა ყოფილიყო.
როგორც თორნიკე მიგინეიშვილმა სასამართლოს სხდომატა დარბაზში თქვა, 6 აპრილს ანდრო ჭიჭინაძემ „ვოთსაფში“ ერთ-ერთი ჩატი დატოვა და აპლიკაცია წაშალა.
ადვოკატმა სასამართლოს მიმართა შუამდგომლობით, გაირკვეს, რა მოხდა და სავარაუდო კანონდარღვევის ფაქტზე პროკურატურისგან რეაგირება მოითხოვა.
„ანუ ვიღაცამ ანდრო ჭიჭინაძის ნაცვლად დატოვა ჩატი. ვიკითხეთ და ექსპერტიზამ დაგვიდასტურა, რომ ეს ტელეფონი იყო დალუქული და სამხარაულის ბიუროში. მანამდე ეყენა პროფილზე ანდრო ჭიჭინაძის ფოტოც და მერე ესეც წაიშალა და ვეღარც ამატებდნენ ანდრო ჭიჭინაძეს და ამბობდნენ, რომ მთლიანად ვოთსაფია წაშლილი“, – თქვა ადვოკატმა.
სინდისის პატიმრების პროცესი საქალაქო სასამართლოში ამ წუთებში მიმდინარეობს.
დაკავებულებს – ანდრო ჭიჭინაძეს, ონისე ცხადაძეს, ჯანო არჩაიას, რუსლან სივაკოვს, ლუკა ჯაბუას, გურამ მირცხულავას, ვალერი თეთრაშვილს, გიორგი ტერიშვილს, ირაკლი ქერაშვილს, რევაზ კინაძესა და სერგეი კუხარჩუკს ბრალი საქართველოს სისხლის სამართლის კოდექსის 225-ე მუხლის მეორე ნაწილით წარედგინათ, რაც ჯგუფურ ძალადობაში მონაწილეობას გულისხმობს.
კომენტარები