საქართველოს საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ, „ქრონიკასთან“, მდინარე იორდანესთან, მაცხოვრის ნათლობის ადგილის მიმდებარედ, საქართველოსთვის მიწის ნაკვეთის გადაცემის შესახებ ისაუბრა და თქვა:
„ამის საფუძველი მისი უწმინდესობისა და იორდანიის მეფის – მისი აღმატებულების თანხმობაა ამ საკითხზე, მისი უწმინდესობისა და უნეტარესობის ინტერესი ამ საკითხისადმი. ეს პერიოდი იყო ამ დიდი ისტორიული მოვლენის მოსამზადებელი პერიოდი. რა თქმა უნდა, ჩვენი საელჩო ძალიან ინტენსიურად იყო ჩართული. ბოლო ორი წლის განმავლობაში, ჩვენი ხელისუფლება ძალიან თანმიმდევრულად მიჰყვებოდა ამ მიზნის შესრულების გზებს. ფაქტია, რომ ეს შედეგი ყველას უნდა გვახარებდეს, რადგან ეს ჩვენი წმინდა მიწაზე ისტორიული მოღვაწეობის გაგრძელებაა.
შექმნილია კომისია, რომელიც კონცეფციის შემუშავებაზე იმუშავებს. თუმცა, ამ კონცეფციის ძირითადი ჩარჩო ცნობილია. ეს უნდა იყოს კულტურული ცენტრი, სადაც მოეწყობა ქართული კულტურის მუზეუმი. მათ შორის დიდი ნაწილი ალბათ დაეთმობა სწორედ ქართველი სასულიერო პირების, საეკლესიო მოღვაწეების წმინდა მიწაზე ცხოვრების პერიოდს და იქ შექმნილ ქრისტიანულ მწერლობასა თუ კულტურის ნიმუშებს.
ეს იქნება კიდევ ერთი კერა, ადგილი, სადაც საქართველო შეძლებს თავისი კულტურის წარმოჩენას და ჩვენ ვიცით, რომ დიდი ნაწილი ქართული კულტურისა სწორედ ქრისტიანულ ღერძს მიჰყვება, მის ირგვლივ არის შექმნილი, მისით საზრდოობს, ამიტომ ეს ადგილი ძალიან შესაფერისი იქნება მისთვის. ადგილი თვითონ არის ძალიან ლამაზი. ახლოს არის მდინარე იორდანესთან. უშუალოდ ამ ნაკვეთთან არის მიბმული ჩასასვლელი სანაპიროზე, რომელიც არის ასევე ძალიან ლამაზი, გამწვანებული“
კომენტარები