მინდა, მოსახლეობას ასეთი სლოგანით მოვუწოდო: „დღეს თითოეულმა ადამიანმა უნდა იცოდეს თავისი ოჯახის ექიმი და მისი ტელეფონი“, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ საკოორდინაციო საბჭოს სხდომის დასრულების შემდეგ განაცხადა.
მისი თქმით, როდესაც ადამიანს სიმპტომები ეწყება, იმის ნაცვლად, რომ ეძებოს, სად ჩაიტაროს ტესტი, უნდა დაუკავშირდეს ოჯახის ექიმს და მისი რეკომენდაციების შესაბამისად იმოქმედოს.
„ჩვენი მიზანია, დაახლოებით 14 000 აქტიური შემთხვევიდან სტაციონარულ მკურნალობაზე იყოს ინფიცირებულთა 15-დან 25 პროცენტამდე, ხოლო დანარჩენები უნდა იმართონ ბინაზე ან „კოვიდ“-სასტუმროებში, ვინაიდან შემთხვევების დიდი ნაწილი არის უსიმპტომო ან მსუბუქად მიმდინარე. ამიტომაც მინდა მოსახლეობას ასეთი სლოგანით მოვუწოდო: „დღეს თითოეულმა ადამიანმა უნდა იცოდეს, ვინ არის თავისი ოჯახის ექიმი და მისი ტელეფონი“. როდესაც იწყება სიმპტომები, არ არის საჭირო ვეძიოთ, სად ჩავიტაროთ ტესტი, სად წავიდეთ, როგორ წავიდეთ. სწრაფად უნდა დავურეკოთ ოჯახის ექიმს და ვიმოქმედოთ მისი დარიგების მიხედვით. შეიძლება მეორე გზაც – დარეკვა 112-ზე, რომელიც გადაგამისამართებთ ოჯახის ექიმთან და იგივე გზა აეწყობა.
იმის გამო, რომ დღევანდელ პირობებში ამ დაავადების მართვის მთავარი დატვირთვა გადადის პირველადი ჯანდაცვის სექტორზე, თითოეულმა ადამიანმა უნდა იცოდეს, ვინ არის მისი ოჯახის ექიმი.
მეორე სლოგანია, რომ თბილისში, ბათუმსა და ქუთაისში, გარდა დახურული სივრცეებისა, პირბადის ტარება აუცილებელია ღია სივრცეებშიც, ვინაიდან ინფექცია ამ სამ რეგიონში ინტენსიურად ცირკულირებს“, – განაცხადა ამირან გამყრელიძემ.
კომენტარები