ამავე გუნდში მე ვცადე ყველაფრის მხილება ფაქტებით, თუმცა… – სოსო გოგაშვილი ივანიშვილის წერილს პასუხობს

სუს-ის უფროსის ყოფილი პირველი მოადგილე, სოსო გოგაშვილი, ბიძინა ივანიშვილის დღევანდელ წერილს ეხმაურება:

“ყოფილი პრემიერის მანკიერებებზე საუბრისთვის ახლა უკვე “ხსნილია”

შესაბამისად “გუნდის” წევრები ბატონი ბიძინა ივანიშვილის პოზიციას ხმებში გაშლიან, მაგრამ იყო დრო, (და ეს ყველამ იცით შიგნით) როდესაც კონკრეტული ანტისახელმწიფოებრივი, თუ ამორალური ქმედებების გამო, ამავე გუნდში მე ვცადე ყველაფრის მხილება ფაქტებით, თუმცა შედეგად შეუვალი მტკიცე კედელი და ტალახის სროლა მივიღე, ამიტომ ნებით გავერიდე.

მტკიცე კედელი კი, როგორც მოსალოდნელი იყო საპნის ბუშტივით გასკდა. ეს ფინალი გარდაუვალი იყო. უბრალოდ მავანნმა, რომლებსაც გავლენიანი საცეცები დღემდე აქვთ ქართულ ოცნებაში, მიზანს მიაღწიეს და “წარმატებულ კრიზის მენეჯერს” და “უპირობო ლიდერს” დღეს სახელმწიფოს მოღალატედ მოიხსენიებენ.

კიდევ ერთხელ ხაზგასმით ვიმეორებ, პოლიტ. ელიტისთვის დღეს არ გამხდარა ცნობილი კონკრეტული ანტისახელმწიფოებრივი ქმედებების შესახებ, ამიტომ, თუ რეალური პოლიტიკის კეთება გსურთ ბატონებო, შეუვალი კედლების შენების ნაცვლად, თავდაპირველად მოსმენა და სწორი გადაწყვეტილებების მიღება უნდა შეგეძლოთ. თორემ პირადად მე ეს ფურცელი თქვენთან დიდი ხნის წინ გადავშალე.”