“ამას თუ არ დავასრულებთ, სისხლში და ურთიერთსიძულვილში დავახრჩობთ ერთმანეთს”

საზოგადოებრივ და პოლიტიკურ ურთიერთობათა აკადემიის დირექტორი გოჩა მირცხულავა, სოციალურ ქსელში, წერს:

“და მაინც, თუნდაც უდიდესი საზოგადოებრივი სიკეთის კონტექსტით – პრევენციის მიზნით, ამდენი სიკვდილის ტირაჟირება, როდესაც ბედნიერების ნიუსის ხვედრითი წილი ნულია, რეალურად სიკვდილის პროპაგანდაა.

შედეგად, აგრესია, რომელიც საზოგადოებაში აკუმულირდება არის უდიდესი საფრთხის შემცველი. აგრესია ვერ ანსხვავებს ჩემს და შენს. ვექტორები თითქოს გამოკვეთილია, მაგრამ როგორც კი ჩნდება პოლიტიკური კონტექსტსი, მყისიერად ჩნდება – “უწინ”…

აქ არის მარტივი ფორმულა, რომელიც არ გაყოფს საზოგადოებას და პირიქით, თუნდაც განსხვავებული პოლიტიკური გემოვნების ადამიანებს გააერთიანებს: დავამარცხოთ სიკვდილი!

რეალურად ხომ სიკვდილმა და მკვლელმა ჩემიანი და შენიანი არ იცის. ჭირისუფალში ხომ ყველანი ვდგავართ, ვისაც გულწრფელად გვტკივა. ამ შემთხვევაში დამნაშავეთა მიმართ მორალური სტანდარტის ფორმირებაც ადვილია.

მესმის ეს ძნელია – რთულია და შეუძლებელიც კი ჩანს ჩვენი ერთიანობა, მაგრამ გვაქვს სხვა გზა?

სხვაგვარად, განა პოლიტიკური ბალანსის ცვლილების შემთხვევაში, ისევ არ გვეყოლება შენი და ჩემი მკვდარი?

მოკლედ, ჩვენ თუ არ მივხვდებით, რომ ამ გამოცხადებული სიკვდილის ქრონიკის დასრულება აუცილებელია, სისხლში და ურთიერთსიძულვილში დავახრჩობთ ერთმანეთს.”