“ალბათ, ომი არ იქნება… ყველაზე საინტერესოა ახლა მოლაპარაკებები რა მიმართულებით წავა” – თორნიკე შარაშენიძე

პოლიტოლოგი, პროფესორი, თორნიკე შარაშენიძე, “ტვ პირველთან” ამბობს:

“მე მგონია, რომ მართლა აღარ აპირებენ ომს, ან არც აპირებდნენ, უბრალოდ მათი მიზანი იყო რაღაც მოლაპარაკებებში ჩათრევა ამერიკის და რაღაც საკითხებზე ყურადღების გამახვილება. თუ აპირებდნენ (ომს), შეიძლება დაინახეს მერე ყველას რეაქცია და გადაიფიქრეს – ორში ერთია. არ ვიცი, პუტინი რას ფიქრობს, მთელი მსოფლიო ცდილობს მიხვდეს და მე, ალბათ, ვერ მივხვდები ასე ადვილად. დღევანდელი მოცემულობიდან გამომდინარე, ალბათ, ომი არ იქნება, ომი უფრო ადვილი იქნებოდა სამი კვირის წინ, როცა არ იყო მთელი დასავლეთი ასე მომართული და არ ამარაგებდნენ იარაღით მას ინტენსიურად. ახლა გაცილებით რთული იქნება ომი. რას მოიგებს, რომ იომოს? ნოსტრიმია ამ ეტაპზე ძალიან მნიშვნელოვანი რუსეთისთვის, 2 წლის მერე, ნოსტრიმს რომ გაშვებს, უკრაინასთან გაცილებით მეტი ბერკეტი ექნება, გაცილებით ძლიერი იქნება უკრაინასთან მიმართებაში და წესით, ომი არ უნდა ეჩქარებოდეს.

ყველაზე საინტერესოა ახლა მოლაპარაკებები რა მიმართულებით წავა. მე მაინც მგონია, მოლაპარაკებები შეეხება ორმხრივ ურთიერთობებს – ეს არის შეიარაღება, ბირთვული და ტანკსაწინააღმდეგო რაკეტები. რაც შეეხება ნატოში ინტეგრაციას, ეს საკითხი რომც წარმოვიდგინოთ, რომ ამერიკლებმა გადაიფიქრეს ნატოს გაფართოება, საჯაროდ ამაზე უარს ვერ იტყვის, ვარიანტი არ არის, ეს რუსეთმაც კარგად იცის. ეს იყო პიარ თემა. ეს უფრო შიდა აუდიტორიისთვის ყოფილიყო შეიძლება გამიზნული. მე დარწმუნებული ვარ, ჩვენი ინტერესის ხარჯზე ეს მოლაპარაკება არ ჩაივლის, ნატოს არ შეეხება, ეს შეეხება ორმხრივ ურთიერთობას შეიარაღების საქმეში და ეს ჩვენი საქმე არ არის – რაც უფრო განიარაღდებიან, მგონი, მთელი მსოფლიოსთვის უკეთესი იქნება.”