ლევან ჯავახიშვილი
„ალიას“ ესაუბრება ექსპერტი, სოსო ცინცაძე.
– ზელენსკი მოლაპარაკებებზე უარს აცხადებს, ამასობაში რუსული აგრესიისგან უკრაინაში მშვიდობიანი მოსახლეობა იხოცება, ქალაქები, მთელი ინფრასტრუქტურა ნადგურდება.
– მესმის, მაგრამ რა ქნან უკრაინელებმა? ჩააბარონ თავიანთი ტერიტორიები რუსებს? დანებდნენ? ეს ამდენი მსხვერპლი რისთვის გაიღეს? ახლა უკრაინა ომს არ შეწყვეტს, ზელენსკი არ წავა არანაირ დათმობაზე, რაც მისთვის არა მარტო პოლიტიკური სიკვდილი იქნება. ახლა ზელენსკიმ მართლა რაიმე კაპიტულანტურ ზავს ხელი რომ მოაწეროს, თავისი ჯარი შემოუბრუნდება და დაამხობს მის ხელისუფლებას. ამდენი სისხლი, გამოვა, რომ ტუილად დაიღვარა. არა, ზელენსკი ომის გაგრძელების მომხრეა და ეს უნდათ უკრაინელებსაც.. რაც შეეხება დანგრეულ ქალაქებს, ინფრასტრუქტურას, მეორე მსოფლიო ომის დროს უარესად დაინგრა ევროპა და ის აღადგინეს და ერთ უკრაინას ვეღარ აღადგენენ? ამერიკა უკრაინის აღსადგენად „მარშალის გეგმა-2“-ის განხორციელებას აპირებს. ამერიკამ უკვე გამოყო 350 მილიარდი დოლარი უკრაინის აღსადგენად, ევროპის ქვეყნებიც გამოყოფენ და აზიისაც. უკრაინა მთელ მსოფლიოს სჭირდება. უზარმაზარი რესურსების ქვეყანაა, ხმელეთით ევროპის 7 ქვეყანას ესაზღვრება და ორი ზღვა აქვს – შავი და ბალტიისა. მისი პორტებიც ყველას სჭირდება.
– ევროპელები და ამერიკელები მოითხოვენ, რომ რუსეთი ტერორიზმის მხარდამჭერ სახელმწიფოდ აღიარონ მათი ქვეყნების მთავრობებმა. ეს თუ მოხდა, რამდენად ცუდად იქნება რუსეთის საქმე?
– ეს უკვე რუსეთის სრული იზოლაცია. რუსეთი ვეღარ ივაჭრებს ვერც ერთ მეტ-ნაკლებად ნორმალურ ქვეყანასთან და ვინმემ თუ ივაჭრა, იმ ქვეყნებს სანქციებს დაადებენ. ეს უკვე რუსეთის ეკონომიკისთვის სრული კატასტროფა იქნება. ინდოეთი, ჩინეთი და რუსეთის პარტნიორი ქვეყნებიც აღარ ივაჭრებენ რუსეთთან. სირია, ავღანეთი, ირანი, პაკისტანი, ლიბანი, სუდანი… ამათ რანგში გავა რუსეთი. ნახე, ახლა რა ხდება. ევროპა მომხრეა, რუსეთი აღიარონ ტერორიზმის მხარდამჭერ ქვეყნად, მაგრამ ამერიკის პრეზიდენტია წინააღმდეგი. „რესპუბლიკელებმა“ და „დემოკრატებმა“ შეიტანეს კონგრესში კანონპროექტი, რომლის მიღების შემთხვევაშიც რუსეთი აღიარებული იქნება ტერორიზმის მხარდამჭერ სახელმწიფოდ. მოკლედ, კანონპროექტს ორპატიული მხარდაჭერა აქვს. კონგრესში უმრავლესობა „რესპუბლიკელებისაა“, ამათ რამდენიმე ათეული „დემოკრატიც“ დაუმატე და ვფიქრობ, მიიღებენ კიდეც ამ კანონს, მაგრამ თეთრი სახლია წინააღმდეგი. ჯო ბაიდენი იმუქრება, თუ კონგრესი კანონს მიიღებს, მე ხელს არ მოვაწერო. ეს უკვე პრეზიდენტის ვეტოა. ამერიკა დღემდე ვაჭრობს რუსეთთან, სანქციების მიუხედავად და იმიტომ არ უნდა ბაიდენს, რომ რუსეთს ეს სტატუსი მისცენ. მერე ვეღარ ივაჭრებს. თუმცა, ვფიქრობ, იძულებული გახდება ბაიდენი, ხელი მოაწეროს კანონს. ბოლო კანონმდებლები მაინც თავისას გაიტანენ.
კომენტარები