ახალი კანონის ამოქმედებამდე ჩადენილ ქმედებაზე რა მოხდება? – ნიკა სიმონიშვილი

შეკრება/მანიფესტაციის შემზღუდველი ახალი რეგულაციები დღეს უკვე მიიღო ოცნების პარლამენტმა მესამე მოსმენითაც.

კანონის დეტალებზე ბევრი კითხვა დამისვეს და ბევრიც შეშინებული იყო, რომ ძველი ჯარიმების გამო არ გამოიყენონ სისხლის სამართლის პასუხისმგებლობა განმეორებაზე, ამიტომ აქვე შევეცდები ყველაფერი განგიმარტოთ, ზედმეტი [და არასაჭირო] შიშის თავიდან ასაცილებლად:

ყველაფერი იწყება ახალი კანონის ამოქმედების შემდეგ ჩადენილი ქმედებიდან. ანუ ახალი კანონის ამოქმედების შემდეგ გზის გადაკეტვაზე უნდა გამოიყენონ ადმინისტრაციული პატიმრობა 15 დღემდე, ვერც ჯარიმას გამოიყენებენ და ვერც პირდაპირ სისხლის სამართლებრივ დევნას დაიწყებენ. მანამდე გქონდათ თუ არა ჯარიმა ან რამდენი, მაგას მნიშვნელობა არ აქვს, ძველი ჯარიმების გამო ვერ დაგიჭერენ, მხოლოდ ახალი გადაკეტვის გამო შეეძლებათ ეს და ესეც მხოლოდ ადმინისტრაციულით. აქვე იმასაც ვიტყვი, რომ 15 დღიანი პატიმრობის გამოყენება აქამდეც შეეძლოთ პირველივე დარღვევაზე.

პატიმრობის გამოსაყენებლად შსს-მ უნდა შეადგინოს ოქმი და მიმართოს სასამართლოს, რომელიც იღებს გადაწყვეტილებას პატიმრობაზე (იმის მსგავსი წესია, როგორც 7 თებერვლამდე იყო გზის გადაკეტვაზე სასამართლო რომ გვაჯარიმებდა). მხოლოდ შსს-ს ოქმი, როგორც ჯარიმების შემთხვევაში იყო, საკმარისი აღარაა, სასამართლოს დასტურიც სჭირდება.

ყველაზე დიდი პრობლემა ისაა, რომ ახალი კანონით ჩადენილი გზის გადაკეტვის გამო პატიმრობის დაკისრების შემდეგ, სისხლისსამართლებრივი პასუხისმგებლობა შემოდის. ანუ სისხლისსამართლებრივი დევნის დაწყება შეიძლება მხოლოდ იმ შემთხვევაში, თუ ახალი წესით (ახალი კანონის ამოქმედების შემდგომ) დაგაკისრეს სახდელი (პატიმრობა) და ამის შემდეგ კიდევ ერთხელ მოხდება ქმედების ჩადენა.