„რესპუბლიკელმა“ კონგრესმენმა, ადამ კინზინგერმა განაცხადა, რომ წარმომადგენელთა პალატის სპეციალური კომიტეტი, რომელიც 6 იანვრის მოვლენებს იძიებს, იკვლევს, ჩაიდინა თუ არა დანაშაული ყოფილმა პრეზიდენტმა, დონალდ ტრამპმა 2020 წლის არჩევნების შედეგების დამოწმებისთვის ხელის შეშლის მცდელობით.
„კანონზე მაღლა არავინ დგას. თუ პრეზიდენტმა შეგნებულად დაუშვა ის, რაც 6 იანვარს მოხდა და ეს არღვევს სისხლის სამართლის კანონს, მან ამაზე პასუხი უნდა აგოს“, – აღნიშნა ადამ კინზინგერმა.
6 იანვარს ვაშინგტონში ვითარება მას შემდეგ დაიძაბა, რაც დონალდ ტრამპის მხარდამჭერები კაპიტოლიუმის შენობაში შეიჭრნენ, სადაც საპრეზიდენტო არჩევნების შედეგებს ამტკიცებდნენ. დემონსტრანტები ჯო ბაიდენის გამარჯვებას აპროტესტებდნენ. შენობიდან კონგრესმენთა ევაკუაცია განხორციელდა.
არეულობის შედეგად 4 ადამიანი დაიღუპა. ვითარების გაკონტროლებას რამდენიმე საათი დასჭირდა, რის შემდეგაც, კონგრესმა მუშაობა განაახლა და ჯო ბაიდენის პრეზიდენტის პოსტზე არჩევა დაამტკიცა. აშშ-ის კაპიტოლიუმში შეჭრის საქმეზე ფედერალურმა პროკურორებმა ბრალი 650-ზე მეტ ადამიანს წაუყენეს.
1-ელ ივლისს, აშშ-ის წარმომადგენელთა პალატაში სპეციალური კომიტეტი შეიქმნა, რომელიც კაპიტოლიუმზე თავდასხმას გამოიძიებს.
კომენტარები