შსს-მ სპეცოპერაციების შედეგად 9 ადამიანი დააკავა.
დაკავებულები არიან:
1992 წელს დაბადებული გ.ლ. (მეტსახელად „აბაშა“), 1993 წელს დაბადებული ბ.ჟ., 1984 წელს დაბადებული გ.გ., 1992 წელს დაბადებული გ.მ. (მეტსახელად „ბუბლიკა“), 1989 წელს დაბადებული დ.გ., 1990 წელს დაბადებული გ.კ., 1997 წელს დაბადებული გ.თ., 1962 წელს დაბადებული ნ. ჩ. (მეტსახელად „მეგრელა“) და 1991 წელს დაბადებული დ.ს.
მათ ბრალად ქურდული სამყაროს წევრობა, ქურდული სამყაროსთვის მიმართვა და ქურდული სამყაროსთვის მხარდაჭერა ედებათ.
შსს-ის განცხადებით, დაკავებულები საზღვარგარეთ მყოფი კანონიერი ქურდის დავალებით და საკუთარი კრიმინალური ავტორიტეტის დამსახურებით, 2021 წლის მაისიდან ორგანიზებას უწევდნენ თბილისის საერთაშორისო აეროპორტში მომუშავე თვითდასაქმებული ტაქსის მძღოლებისგან “ქურდული საერთოს” შეგროვებას.
უწყების განცხადებით, ბრალდებულები უზრუნველყოფდნენ, რომ თბილისის საერთაშორისო აეროპორტში მომუშავე კერძო ტაქსის მძღოლებს ე.წ ქურდულ საერთოში მათ მიერ გამომუშავებული თანხის ნახევარი შეეტანათ, სანაცვლოდ კი მათ აეროპორტის ტერიტორიაზე მუშაობის უფლებას აძლევდნენ.
იმ ტაქსის მძღოლებს, რომლებიც უარს ამბობდნენ თანხის ნახევრის გადახდაზე, დაშინების და მუქარის გზით უკრძალავდნენ აეროპორტის ტერიტორიაზე მუშაობას.
ამ დანაშაულებრივი ქმედებებით ტაქსით მომსახურების საფასური ხელოვნურად იზრდებოდა.
შს მინისტრის მოადგილის თქმით, ჩხრეკის შედეგად ამოღებულია მობილური ტელეფონები, რომლითაც ისინი ერთმანეთს და საზღვარგარეთ მყოფ ქართველ კანონიერ ქურდს უკავშირდებოდნენ.
დანაშაული 10 წლამდე თავისუფლების აღკვეთას ითვალისწინებს.
შსს-ს არ უთქვამს, მაისიდან დღემდე, 8 თვის მანძილზე, როგორ არ მოხერხდა ამ ამბის გამოძიება და როგორ მოხდა, რომ მინიმუმ 8 თვის მანძილზე, ქვეყნის აეროპორტის შესასვლელს, ფაქტიურად სახელმწიფო კი არა, “ქურდული სამყარო” აკონტროლებდა. რას ნიშნავს და როგორ უკრძალავდა ტაქსის მძღოლებს აეროპორტის ტერიტორიაზე მუშაობას და აეროპორტის შესასვლელთან მისვლას “ქურდული სამყარო”? მით უფრო, რომ ადგილზე არის დაცვა, კამერები. სად იყო მთელი ეს დრო სახელმწიფო? – ამ თემაზე გომელაური უწყებას არ უსაუბრია.
კომენტარები