იმედია, ღარიბაშვილი გაბედავს იმის გაკეთებას, რაც ვერ გაბედა გახარიამ, ბახტაძემ და კვირიკაშვილმა – სანდრო ბრეგაძე

დიდგორობა გამოცხადდეს სახელმწიფო-ეროვნულ დღესასწაულად და უქმე დღედ – ამ მოთხოვნით პოლიტიკურმა პარტიამ “ქართული მარში-ეროვნულმა მოძრაობამ” მთავრობის ადმინისტრაციაში პრემიერ-მინისტრის სახელზე წერილი შეიტანა.

როგორც თავად აღნიშნავენ, ამ დღესასწაულს ჩვენი ქვეყნის მოქალქეებისთვის უდიდესი ეროვნული მნიშვნელობა აქვს და აღნიშნული საკითხი აუცილებლად უნდა დადგეს საქართველოს მთავრობის დღის წესრიგში.

“დიდგორობა არ არის ჭიაკოკონობანა და უბრალო დღესასწაული, ეს არის ქართველი ერის ყოფნა-არ ყოფნის გადაწყვეტის დღე, როდესაც გაიმარჯვა და დაიმკვიდრა უფლება, რომ ჰქონოდა საკუთარი, ძლიერი სახელმწიფო. 900 წლის იუბილე სრულდება ამ დიდი გამარჯვებიდან და ხელისუფლებამ უნდა გამოაცხადოს დიდგორობა, როგორც საერთო სახალხო ეროვნული დღესასწაული,”- აცხადებს “ქართული მარში – ეროვნული მოძრაობის” გენერალური მდივანი ირაკლი შიხიაშვილი.

სანდრო ბრეგაძე:

“ვერც კვირიკაშვილის, ვერც ბახტაძის და ვერც გახარიას მთავრობამ ვერ გაბედა “დიდგორობის” სახელმწიფო დღესასწაულად გამოცხადება

შეგვაქვს მოთხოვნა, რომ დიდგორის ბრწყინვალე გამარჯვების საიუბილეო 900 წლისთავზე დიდგორობა გამოცხადდეს საერთო-სახალხო-სახელმწიფო დღესასწაულად იმედი გვაქვს რომ ირაკლი ღარიბაშვილის მთავრობა თავის წინამორბედებისგან განსხვავებით გაბედავს და დააკმაყოფილებს ქართველი ერის სურვილს – 2021 წელს დიდგორობა გამოცხადდება ეროვნულ დღესასწაულად “

შეგახსენებთ, რამდენიმე დღის წინ, სანდრო ბრეგაძემ, განაცხადა:

“შევხვდით თურქეთის ელჩს, დადასტურდა რომ თურქეთს არც გააჩნდა და არც გააჩნია პრეტენზია დიდგორობის სახელმწიფო დღესასწაულად გამოცხადებაზე…”