ქართული ოცნების თავმჯდომარის, ირაკლი კობახიძის განცხადებით 20 ივნისის საქმეზე ამნისტია უნდა შეეხოს ყველას – მათ ვის წინააღმდეგაც უკვე აღძრულია სისხლის სამართლის საქმე და მათაც, ვისზეც შეიძლება მომავალშიც აღიძრას.
“ჩვენ, პირველ რიგში, ვხელმძღვანელობთ თვითონ დოკუმენტის ტექსტით და არა მარტო ტექსტით — შინაარსზე იყო გაკეთებული განმარტებები ელჩების მხრიდან და დანიელსონის მხრიდან, როდესაც ჩვენ ვსაუბრობდით ამნისტიის შესახებ კანონზე. შინაარსი მდგომარეობს იმაში, რომ ეს ამნისტია უნდა შეეხოს ყველას, ვინც არის დაკავშირებული ამ მოვლენებთან [20 ივნისის საქმე], ვისთან დაკავშირებითაც აღიძრა, ან შეიძლება აღიძრას სისხლის სამართლის საქმე.
რაც შეეხება ნიკანორ მელიას, ყველაზე მძიმე დანაშაული 20 ივნისის ღამეს აქვს სწორედ მას ჩადენილი. აქედან გამომდინარე, თუ ამნისტია შეეხება ნიკანორ მელიას, ბუნებრივია ეს უნდა შეეხოს ყველა სხვასაც, ვისაც შეიძლება რაიმე დანაშაული ჰქონდეს ჩადენილი იმ ღამეს”, — განაცხადა ირაკლი კობახიძემ.
ევროპული საბჭოს პრეზიდენტის, შარლ მიშელის ინიციატივით შექმნილი დოკუმენტის იმ ნაწილზე, სადაც 20 ივნისის საქმეზე ბრალდებულების ამნისტირებაზეა საუბარი, განსხვავებული ინტერპრეტაციები ვრცელდება.
სტრატეგია აღმაშენებლის ლიდერმა, გიორგი ვაშაძემ განაცხადა, რომ ამნისტია არ შეეხებათ მათ, ვინც უკვე არაა მიცემული სისხლის სამართლებრივ პასუხისგებაში. რაც შეეხება სამართალდამცველებისთვის ამნისტირებას, ქართული ოცნების ლიდერები ამბობენ, რომ იგი სამართალდამცველებსაც უნდა შეეხოთ, ოპოზიცია ამას ეწინააღმდეგება. ამ ამბავს გამოეხმაურნენ თავად 20 ივნისს დაზარალებულები, რომელებიც ამბობენ, რომ პარტიებს არ აქვთ უფლება გადაწყვიტონ, შეწყდეს თუ არა საქმეების განხილვა.
სამართალდამცველები ამნისტირებას დაუშვებლად მიიჩნევენ საქართველოს ახალგაზრდა იურისტთა ასოციაცია და ადამიანის უფლებათა ცენტრი — ორგანიზაციები, რომლებიც 20 ივნისს დაზარებული მოქალაქეებისა და ჟურნალისტების ინტერესებს იცავენ როგორც საქართველოში, ისე ადამიანის უფლებათა ევროპულ სასამართლოში.
“ალია” კი შეგახსენებთ, 20 ივნისის მოვლენებზე პასუხისმგებლობა მაშინდელმა შს მინისტრმა, გიორგი გახარიამ აიღო, ოღონდ, რა უყო მერე ამ პასუხისმგებლობა, რომ აიღო, სად დადო – არავინ იცის. ამბობენ, რომ ე.წ. ოპოზიციაში მოსვლამდე გახარია გარანტიებს ითხოვს – რამდენად მართალია, მალე გამოჩნდება.
ოღონდ, რას უზამენ ხორავას საქმეს, მაჩალიკაშვილის საქმეს, თორნიკე მერებაშვილის საქმეს და ა.შ., რამდენ ამნისტიას გამოსცემს “ოცნება”?
კომენტარები