ინფექციური საავადმყოფოს დირექტორის, თენგიზ ცერცვაძის განცხადებით, პირბადეების გამოყენება ქვეყანაში 70 პროცენტიდან 40 პროცენტამდე შემცირდა. მისი თქმით, მესამე ტალღას შეზღუდვების განახლება მოჰყვება, რაც ქვეყნის ეკონომიკის, ბიზნესისთვის დამაზიანებელი იქნება.
„ჩემში შეშფოთებას იწვევს პირბადეების ტარების თემა. სამწუხაროდ, პირბადეების გამოყენება შემცირდა, 70 პროცენტიდან 40 პროცენტამდე ჩამოვიდა, რაც ძალიან დაბალია და შედეგმაც არ დააყოვნა. შედეგი არის, რომ თუ მთელი ორი თვის განმავლობაში ვინარჩუნებდით ახალი შემთხვევების და გარდაცვალების ძალიან დაბალ მაჩვენებელს, ერთ-ერთ ყველაზე დაბალ მაჩვენებელს ევროპასა და ამერიკაში, იმ ქვეყნებზე დაბალ მაჩვენებელს, რომელსაც ვაქცინაცია უკვე ოთხი თვის წინ ჰქონდათ დაწყებული, აი, ახლა აქ გაჩნდა ბზარი. აღარ ატარებენ პირბადეებს, არ იცავენ სოციალურ დისტანცირებას, აწყობენ შეკრებებს და შედეგად ბოლო სამ დღეში ახალი შემთხვევების ზრდის ტენდენცია აღინიშნება. საბედნიეროდ, ჯერ სიკვდილიანობა რჩება დაბალ ნიშნულზე. ეს არის ძალიან სერიოზული საგანგაშო სიგნალი, ეს ჯერ არ ნიშნავს მესამე ტალღას, მაგრამ ძალიან სერიოზული სიგნალია, რომ თუ ჩვენ არ მოვეგებით გონს და არ დავიცავთ სიფრთხილის ზომებს, მხედველობაში მაქვს პირბადეების მასობრივი ტარება, სოციალური დისტანცია და ხალხმრავალი შეკრებები, ჩვენც არ ვართ გამონაკლისი. ჩვენ ვერ ვცხოვრობთ ევროპის და მსოფლიოს გარეთ მათგან დამოუკიდებლად და თუ იქ მესამე ტალღა უკვე დაიწყო ან ზოგიერთ ქვეყანაში იწყება, ჩვენც სამწუხაროდ, შესაძლოა, ვერ ავცდეთ მესამე ტალღას. ამას მოყვება ისევ შეზღუდვების განახლება, რომელიც როგორც იქნა მოვხსენით და ადამიანები უბრუნდებიან ნორმალურ ცხოვრების წესს. კიდევ ერთი შეზღუდვები რომ დაიწყოს, ეს კატასტროფა იქნება ქვეყნის ეკონომიკისთვის, ბიზნესისთვის, ადამიანებისთვის, ეს ძალიან მტკივნეული იქნება, ამიტომ გავითვალისწინოთ, ეს ჩვენივე ინტერესებშია, პირბადის მასობრივი ტარება თქვენი კეთილდღეობის საწინდარია“
კომენტარები