დაავადებათა კონტროლის ეროვნული ცენტრის გენერალური დირექტორის მოადგილის, პაატა იმნაძის განცხადებით, ანაფილაქსიური რეაქციის განვითარების რისკები, Pfizer-სა და AstraZeneca-ს ვაქცინებით იმუნიზაციის შემდგომ, თითქმის ერთნაირია.
მისი თქმით, იმის ალბათობა, რომ ვაქცინაციის შემდეგ ანაფილაქსია მოხდება, ყოველთვის არსებობს.
“სტატისტიკის მიხედვით, Pfizer-ს და AstraZeneca-ს ანაფილაქსიური გართულებები ერთნაირი აქვს. აქედან გამომდინარე, ის, რომ ეს ვაქცინა გავიკეთო, რადგან ამას არ აქვს ანაფილაქსია, ასე არ არის. სამწუხაროდ, იმის ალბათობა, რომ ანაფილაქსია მოხდება, ყოველთვის არსებობს,”- აცხადებს პაატა იმნაძე.
შეგახსენებთ, რომ ვაქცინაციის პროცესებთან დაკავშირებით, ჯანდაცვის სამინისტროში ჯანდაცვის ექსპერტებისა და მედიკოსების შეხვედრა გაიმართა. სპეციალისტების შეფასებით, იმის თქმის საფუძველი, რომ AstraZeneca-ს ვაქცინა საფრთხის შემცველია და მისი გამოყენება უნდა შეწყდეს, არ არსებობს.
ამასთან, გვერდითი რეაქციების და გამოვლენილი გართულებების მიუხედავად ევროკავშირის მარეგულირებელმა AstraZeneca-ს ვაქცინა უსაფრთხოდ და ეფექტურად მიიჩნია. 30 დღიანი დაკვირვების შემდეგ, ევროპის წამლის სააგენტომ AstraZeneca-ს კოვიდსაწინააღმდეგო ვაქცინასთან დაკავშირებით, საბოლოო დასკვნა გუშინ დადო. დოკუმენტში წერია, რომ ვაქცინის გამოყენება თრომბოემბოლიას არ უკავშირდება და სარგებელი კორონავირუსის წინააღმდეგ ბრძოლაში მის შესაძლო რისკებს აღემატება.
კომენტარები