“დედის გინებისგან დაცვა!… მსოფლიო პატენტი უნდა მოვითხოვოთ მაგაზე” – ირაკლი ოქრუაშვილი

თავდაცვის ყოფილი მინისტრი, ირაკლი ოქრუაშვილი, სოციალურ ქსელში წერს:

“ყველაფერში ინოვატორები ვართ ქართველები.

ფიზიკური საფრთხისგან დაცვა გამიგია; კომპიუტერის ვირუსისგან დაცვა გამიგია; ჩასახვის საწინააღმდეგო დაცვა გამიგია; სეტყვის საწინააღმდეგო დაცვაც გამიგია, მაგრამ ანზორ ჩუბინიძე ყოფილა ყველაზე ინოვატორი დაცვა მსოფლიოში – დედის გინებისგან დაცვა.

მსოფლიო პატენტი უნდა მოვითხოვოთ მაგაზე.

ეს ამბავი 100 წლის წინ დაახლოებით ასე იქნებოდა.

მოურავოო, ბიჭო ანზორ – გადმოსძახებდა, სოლოლაკის აივნიდან ჩუბინიძიაანთ ერთგულ მოურავს, ბატონიშვილი მეფისტოფელის სახით.

გისმენ შენი კვნესა მეოო – საჯინიბოდანვე გააგონებდა მოურავი.

გიბრძანებ, ახლავე დაეცე, მოსკოვის პროსპექტის ჭალებში, ფეისბუკმომხმარებელ ვანოს და სულ ნაცარტუტად უქციო სახლ-კარიო – გასძახებდა ბატონიშვილი. თან მეზობლებიც დაისწარი და ცხენებზე მიგალკების დაყენება არ დაგავიწყდესო, ზედ დააყოლებდა.

ამ დროს, საქსოვით ხელში და ჩიხტიკოპით თავზე, კნეინა ეკა მედიდურად ჩაილაპარაკებდა – მამესწრო ვაჟკაციო.

სულაც არაა საქმე ისე, როგორც თქვენ ხატავთ მაგ ბავშვთან მიმართებაში. ხარი ხართან რომ დააბაო ხომ გსმენიათ.

მამამისის გვერდით სხვას რას ისწავლიდა?

მიმიშვით ღუმელთან, 6 თვით წავიყვან ჯარში და მასზე მეტად მამამისის მაგინებელს ვერ ნახავთ. პატრიოტიზმსაც ვასწავლი და ორფოლოს ტალახითაც ცოტა ფერს ავაღებინებ.

მინიმუმ მამა-შვილი სერიოზული სამკურნალო არიან.

ჩვენ კიდევ მაგარი გადარჩენილები ვართ, ოჯახის სტომატოლოგი რომ დაგვინიშნეს ჯანდაცვის მინისტრად და არა ოჯახის ფსიქიატრი.”