რუსეთის დასავლეთ ნაწილში, ნიჟნი ნოვგოროდის ოლქის ქალაქ ძერჟინსკში მდებარე მიტოვებულ ქარხანასთან ადგილობრივმა მოსახლეობამ ცისფერი შეფერილობის ბეწვის მქონე მიუსაფარი ძაღლები შენიშნა. როგორც ვარაუდობენ, ცხოველების ბალანი, შესაძლოა, იქ არსებულ ქიმიურ ნარჩენებს შეეღება. მედიასა და სოციალურ ქსელებში ფოტოსურათების გავრცელების შემდეგ, ადგილობრივი ხელისუფლების წარმომადგენლებმა ტერიტორიის დათვალიერებისა და ძაღლების ჯანმრთელობის მდგომარეობის შემოწმების სურვილი გამოთქვეს.
საბჭოთა კავშირის დროს აშენებულ ქარხანაში, რომელმაც ფუნქციონირება ექვსი წლის წინ ფინანსური კრიზისის გამო შეწყვიტა, ძლიერ ტოქსიკურ ნივთიერება წყალბადციანმჟავასა და ორგანულ მინას აწარმოებდნენ. დაწესებულების დროებითი მმართველი, ანდრეი მისლივეცი არ გამორიცხავს, რომ მიუსაფარმა ძაღლებმა მიტოვებულ ნაგებობაში ხეტიალისას ცისფერი შეფერილობის არაორგანულ ნივთიერებას, სპილენძის სულფატს მიაგნეს. ეს უკანასკნელი წვასა და ქავილს იწვევს, რამაც, შესაძლოა, ანთებითი პროცესის განვითარებას შეუწყოს ხელი.
“მიტოვებული ქარხნის ტერიტორიაზე უამრავი მიუსაფარი ძაღლი დახეტიალობს. მათ ალბათ ძველი ქიმიკატების ნარჩენები იპოვეს და მასში იგორავეს. დიდი ალბათობით, ეს სპილენძის სულფატი უნდა ყოფილიყო. უჩვეულო შეფერილობის ბეწვის მქონე ცხოველები აქ რამდენიმე წლის წინაც შენიშნეს. გასაკვირი არ არის, რომ ძაღლებმა მსგავს რამეს მიაგნეს, რადგან მათ ყურადღებას არავინ აქცევს”, – აცხადებს მისლივეცი.
აღსანიშნავია, რომ მსგავსი ფაქტი ცოტა ხნის წინ დიდ ბრიტანეთშიც დაფიქსირდა. ინგლისის ჩრდილო-დასავლეთ ნაწილში მდებარე კამბრიის საგრაფოს ქალაქ კარლაილში ქიმიური ნარჩენებით ცისფრად შეღებილი თოლია აღმოაჩინეს, რომელიც თავდაპირველად ეგზოტიკური ფრინველი ეგონათ.
წყარო – popx.ge
კომენტარები