შესაძლებელია, ვიღაცამ შეგნებულად დაურეკა გავრილოვს, მაგრამ ამ ცნობილი ფორმულით, გავრილოვი და “ოცნება” მეგობრები გამოდიან – გია ხუხაშვილი

პოლიტოლოგი, გია ხუხაშვილი “პალიტრანიუსის” ეთერში, ამბობს”

“როგორც მოსალოდნელი იყო პარლამენტმა მოუხსნა ნიკა მელიას უფლებამოსილება, ეს შეიფუთა კანონის უზენაესობის პრინციპით, აპელირებენ იმ კანონზე, რომელიც თვითონვე დაარღვიეს, როდესაც იგივე ნიკა მელიას განცხადება, იგივე სადეპუტატო უფლბამოსილების შეწყვეტის მოთხოვნით არ დააკმაყოფილეს. მაშინ ამბობდნენ რომ კანონი არ ზღუდავდათ მიეღოთ ეს უცნაური გადაწყვეტილება, რომ ადამიანი ამუშაონ იქ, სადაც არ უნდა მუშაობა და მინდა მათ ვუთხრა, ახლაც შეიძლებოდა მიეღოთ საკუთარი მრწამსის შესაბამისად გადაწყვეტილება და ესეც კანონის დარღვევა არ იქნებოდა.

ეს არის კლასიკური შემთხვევა, როდესაც პოლიტიკურად მოტივირებული გადაწყვეტილება მიიღეს და არა სახელმწიფოებრივი. დეპუტატები იქ იმისთვის კი არ სხედან, რომ საკუთარი პარტიისკენ ქაჩონ მუდმივად საბანი, არამედ იმისთვის რომ სახელმწიფოებრივად იაზროვნონ, მაგრამ ეს არის ვიწრო, პოლიტიკური კომპლექსებით განპირობებული გადაწყვეტილება.

კომპლექსზე იმიტომ ვსაუბრობ, რომ მთავარი მოტივი ამ გადაწყვეტილების არის შიში იმისა, რომ მათი შინაგანი სისუსტის დემონსტრირება არ მოხდეს – ყველაზე მეტად ამისი ეშინიათ, მაგარ ბიჭობანას თამაშობენ და ეპრანჭებიან მამას, რომელმაც მათ გადააბარა თავისი ქონება სამართავად, კი იცის, რომ ბევრი არაფრის მაქნისები არ არიან, მაგრამ შეხედავს რას იზამენ და ესენიც ყოველდღიურად უმტკიცებენ, რომ მამიკოზე ნაკლები არაფრით არიან.

ამ მარაზმში ვართ, ტატამზე მორიგი ჭიდაობისთვის ემზადებიან მხარეები და ქართული საზოგადოება, რომელსაც ორი მთავარი პრობლემა აწუხებს – ეს არის სიკვდილის შიში და შიმშილის შიში, პირდაღებული უყურებს ამას, ნაცვლად იმისა რომ ყველამ ერთად გადავწყვიტოთ პრობლემები.

კომიკურად გამოიყურებოდა ქართული ოცნების მესიჯბოქსი, როდესაც დაბეჯითებით ცდილობდნენ გავრილოვი “ჩაედოთ” ოპოზიციისთვის, ამტკიცებდნენ, რომ გავრილოვი და ოპოზიცია ერთად მუშაობდნენ, ლამის ოპოზიციამ დაუწერა გავრილოვს ტექსტი. სინამდვილეში, შესაძლებელია და მე ამას ვუშვებ, რომ ვიღაცამ შეგნებულად დაურეკა გავრილოვს, იმისათვის, რომ მას გამოეთქვა თავისი პოზიცია, რომელიც ძალიან სამწუხაროა, მაგრამ ემთხვევა “ქართული ოცნების” პოზიციას ნიკა მელიასთან, ნაციონალურ მოძრაობასთან მიმართებაში, მაგრამ ის რომ გავრილოვმა სხვისი აზრი თქვა და არა თავისი, ეს სრული სისულელეა. მან თქვა ის, რისი რწმენაც აქვს. მას მართლა სჯერა, რომ მის გამო ისჯება დღეს მელია.

თუ ჩვენ პრინციპზე ვილაპარაკებთ და ორივესთავის, გავრილოვისთვის და ქართული ოცნებისთვის მტერი არის მელია, რა გამოდის მაშინ? ჩემი მტრის მეტერი, ჩემი მეგობარია, ხო? ამ პრინციპით ხელმძღვანელობენ? შეიძლება ისინი არ აღიარებენ, მაგრამ ამ ცნობილი ფორმულით, თუ ერთნაირად აზროვნებენ და ერთ ადამიანს თვლიან საკუთარ მტრად, მაშინ ისინი მეგობრები გამოდიან – დაფიქრდით ამაზე და იქნებ, რაღაცნაირად ცხვირის წინ გაიხედოთ და დაინახოთ ქართული სახელმწიფო, ნაცვლად იმისა, რომ ამ საგიჟეთში აცხოვროთ ქართული საზოგადოება.”