ავსტრიაში საქართველოს ელჩი, ქეთევან ციხელაშვილი, სოციალურ ქსელში, აქვეყნებს ფოტოებს და წერს:
“აი, როგორ არის სინამდვილეში!
for English scroll below
ეს არის იმ სოფლის, ტუშურების საჯარო სკოლა, რომელიც სრულიად სხვა ფოტოებით ავსტრიული Der Standart-ის 1 თებერვლის გამოცემაში მოხვდა და ავსტრიელ მკითხველს ქართული საგანმანათლებლო სისტემის შესახებ სავარაუდოდ, შოკისმომგვრელი, წარმოდგენა შეუქმნა. https://www.derstandard.at/…/nach-tinas-abschiebung-von…
კერძოდ, სტატია ეხმიანება 27 იანვარს ავსტრიიდან დეპორტირებული ქართული ოჯახის ამბავს და აღწერს სად უნდა განაგრძოს სწავლა ოჯახის უფროსმა ქალიშვილმა. მასალა, როგორც ავტორი წერს, ოჯახის ადვოკატმა მიაწოდა. ჟურნალისტი თანაუგრძნობს გოგონას, და ხაზს უსვამს გაუსაძლის სასწავლო პირობებს, რაშიც გოგონა აღმოჩნდება საქართველოში დაბრუნების შემდგომ. ემოციები გასაგებია და მეტიც, ეს თანაგრძნობა ძალიან დასაფასებელი ამ ოჯახისა და პატარა თინას მიმართ. ამაზე ქვემოთ კიდევ ერთხელ დავწერ კომენტარს, რომლითაც გამოვეხმაურე ამ საკითხს. მაგრამ აქ მინდა მხოლოდ ნახოთ თინას ბებიის სოფლის სკოლის სურათები, რომელშიც მას მოუწევს სიარული თუ ოჯახი ამას განიხილავს, ყოველ შემთხვევაში, ახლა ასე ჩანს მათი ადვოკატის მიერ ავსტრიული მედიისთვის მიწოდებული ინფორმაციით.
სურათები კი, რომელიც ოჯახის ადვოკატის გზით მოხვდა ავსტრიულ გამოცემაში, სავარაუდოდ ძველი ბაღის ინფრაქტუქტურის ნაწილია, რომელიც ახალი ბაღის აშენების შემდგომ არ ფუნქციონირებს უკვე წლების განმავლობაში.
თავად განსაჯეთ!
აქ საქმე საქართველოს იმიჯს ეხება ავსტრიაში!
ამიტომ თავს ვალდებულად ვთვლი ეს ინფორმაცია გავასაჯაროვო. ცხადია ამაზე კომუნიკაცია გამომცემლობასთანაც გვექნება.
რაც შეეხება საგანმანათლებლო სისტემას საქართველოში, მე ძალიან კარგად ვიცი, რომ ჯერ კიდევ ბევრი რამ არის გასაკეთებელი, ბევრი სკოლა გასარემონტებელი და ბევრი რეფორმა მიმდინარეობს, თუმცა, ისიც ვიცი, რამდენად პრიორიტეტულია ეს სფერო და რამდენი გაკეთდა, რა შედეგებია და რა კეთდება სკოლების, მათ შორის, სასკოლო ინფრასტრუქტურის მიმართულებით. ბევრი სოფლის სკოლა მე თავად მაქვს ნანახი. ჩვენი ბავშვების სასკოლო მზაობის დონე, მათ შორის სოფლებიდანაც, რასაც ასე უსვამს ხაზს ამ სტატიის ავტორი, მერწმუნეთ, საკმაოდ მაღალია.
თუმცა აქ ვენის გიმნაზიასთან შედარება არ არის ჩემი მიზანი.
მიზანი ის არის, რომ საქართველო და მისი იმიჯი არ წარმოჩინდეს დამახიჯებულად!
რაც შეეხება თინას და მის ოჯახს, ამ დღეებში ბევრი ემოცია, პროტესტი და განხილვა უკავშირდებოდა 27 იანვარს მისი ოჯახის დეპორტაციას ავსტრიიდან. გარწმუნებთ, ძალიან მტკივნეულია ჩემთვის, როგორც ელჩისთვის, საქართველოს მოქალაქისთვის და ადმიანისთვის როდესაც ოჯახებს, რომელთაც ყავთ ბავშვები, მასპინძელი ქვეყნის უარის შემთხვევაში, უწევთ ადგილსამყოფელის დატოვება. ყველაზე მეტად ბავშვებზე შეგვტკივა მეც და ჩემს კოლეგებსაც გული, რომელთათვისაც ეს მძიმე გამოცდილება და რთული გზაა.
გვაქვს რა ჩვენი მოქალაქეების რეადმისიის ვალდებულება, რაც მნიშვნელოვანი წინაპირობაა ევროკავშირთან თანამშრომლობის და ჩვენი ლეგალური მიმოსვლის, მათ შორის ვიზის ლიბერალიზაციის რეჟიმისათვის, მინდა გითხრათ, რომ ამ საკითხზე ჩვენს დედაქალაქს აქვს კომუნიკაცია ავსტრიელ კოლეგებთან.l
ჩემსა და ჩვენი დიპლომატიური სამსახურის ერთ-ერთ მთავარ მიზანს სწორედ ქვეყნის საზღვრებს გარეთ საქართველოს მოქალაქეების უფლებების დაცვა და ხელშეწყობაა, რასაც აქტიურად ვახორციელებთ. მაგრამ, უნდა ავღნიშნოთ, რომ ყველა მსგავს შემთხვევაში, როდესაც მოქალაქე უარს აცხადებს საქართველოს მოქალაქეობაზე და მიმართავს სხვა სახელმწიფოს თავშესაფრის მოთხოვნით (ამ ოჯახის შეთხვევაში, ავსტრიის რესპუბლიკას), საქართველოს ოფიციალური წარმომადგენლობა მოკლებულია ყოველგვარ შესაძლებლობას, რაიმე ფორმით ჩაერიოს ან გავლენა მოახდინოს ავსტრიის რესპუბლიკის გადაწყვეტილებაზე. ეს არის ცალსახად მასპინძელი ქვეყნის კომპეტენცია. მეტიც, ქართული სახელწმიფო ვალდებულია უკან მიიღოს მოქალაქე, დეპორტაციის თუ რეადმისიის გზით.
დასაფასებელია ასეთი თანადგომა, რომელიც პატარა თინას მიმართ გამოიჩინა ავსტრიულმა საზოგადოებამ. იმედს გამოვთქვამთ, რომ ის და ნებისმიერი პატარა, რომელიც დღეს ანალოგიურ სიტუაციაშია, გადალახავს ამ გამოცდილებას და მომავალში იქნება წარმატებული, მეტიც, ისარგებლეს ყველა იმ სიკეთით, რომელიც სწორედ საქართველოს მოქალაქეებისათვის გახდა ხელმისაწვდომი ევროკავშირში, მათ შორის ავსტრიაში, ასოცირებული შეთანხმებით, იქნება ეს სასწავლო პროგრამები, უვიზო მიმოსვლა, ა.შ.”
კომენტარები