აფრიკის ჩრდილოეთ ნაწილში მდებარე მსოფლიოში უდიდესი უდაბნო საჰარა, რომლის ფართობიც 9 მილიონ კვადრატულ კილომეტრს აღემატება, მოულოდნელად მოსულმა თოვლმა დაფარა. ატმოსფერული ნალექი ალჟირის ნაამის პროვინციაში მდებარე ქალაქ აინ სეფრას ტერიტორიაზე ტემპერატურის -3 °C-მდე დაცემის შემდეგ წამოვიდა. რეგიონისთვის უჩვეულო ბუნებრივი მოვლენის ამსახველი სურათები ადგილობრივმა ფოტოგრაფმა, ქარიმ ბუშეტატამ გადაიღო.
აინ სეფრა, რომელსაც უდაბნოს კარიბჭის სახელით მოიხსენიებენ, ზღვის დონიდან 1000 მეტრის სიმაღლეზე მდებარეობს და ატლასის მთებით არის გარშემორტყმული. ბოლო ოთხი დეკადის განმავლობაში ამ ქალაქში თოვლი მხოლოდ სამჯერ – 2017, 2018 და 2021 წლებში მოვიდა. ყველაზე ცივ, იანვრის თვეში იქ ჰაერის საშუალო ტემპერატურა 12 °C-ს შეადგენს, ივლისში კი 40 °C-მდე სიცხე ფიქსირდება.
საჰარის უდაბნოში, რომელიც ჩრდილოეთ აფრიკის უდიდეს ნაწილს, მათ შორის ალჟირის 80 პროცენტს მოიცავს, ჰაერის ტემპერატურა და ტენიანობა რამდენიმე ასეული ათასი წლის განმავლობაში ყალიბდებოდა. იმის მიუხედავად, რომ ეს ადგილი მშრალი ჰავითა და ატმოსფერული ნალექის სიმცირით ხასიათდება, მეცნიერების ვარაუდით, დაახლოებით 15 ათასი წლის შემდეგ ქვიშიანი დიუნები იქ ბალახითა და ხე-მცენარეებით დაიფარება.
დიდთოვლობის მომსწრე გახდა არაბეთის ნახევარკუნძულზე განლაგებული სახელმწიფოს, საუდის არაბეთის მოსახლეობაც. ტემპერატურის -2 °C-მდე დაცემის შემდეგ ატმოსფერული ნალექი ქვეყნის სამხრეთ-დასავლეთ ნაწილში მდებარე ასირის რეგიონში მოვიდა და მიდამო თეთრად შეღება. საყურადღებოა, რომ გასული ნახევარი საუკუნის განმავლობაში იქ ტემპერატურა ნულ გრადუსს პირველად ჩამოსცდა.
საუდის არაბეთში თოვლი 2020 წელსაც მოვიდა. მაშინ ატმოსფერული ნალექი ქვეყნის ჩრდილო-დასავლეთ ნაწილში მდებარე ტაბუკის რეგიონში დაფიქსირდა. ერთი წლით ადრე კი ეს ტერიტორია თოვლმა აპრილის თვეში დაფარა.
თოვლი და ყინვა უდაბნოში საკმაოდ იშვიათი მოვლენაა. იქ, შესაძლოა, ღამით ტემპერატურა მკვეთრად დაეცეს, თუმცა მოსული ნალექი დიდი ხნის განმავლობაში ვერ ძლებს და ჩვეულებრივ, მეორე დღესვე დნება. ალჟირსა და საუდის არაბეთში მიმდინარე თვეში დაბალი ტემპერატურის შენარჩუნებას ხელი მაღალი ატმოსფერული წნევის მქონე ცივი ჰაერის მასების გადაადგილებამ შეუწყო. ცენტრალური აზიიდან ანტიციკლონებმა არაბეთის ნახევარკუნძულს მიაღწიეს, ტენით გაჯერებული ჰაერი კი დაბალი ტემპერატურის პირობებში თოვლად გარდაიქმნა.
კომენტარები