ამ წუთებში აშშ-ის ელჩის რეზიდენციაში ხელისუფლებას და ოპოზიციას შორის მოლაპარაკებების III რაუნდი იმართება.
ოპოზიციამ ხელისუფლებას საკუთარი წინადადებები უკვე შესთავაზა.
ადგილზე გამოჩნდნენ პოლიტიკური პარტიის ლიდერებიც:
“მოლაპარაკებები მიმდინარეობს იმისთვის, რომ პოზიციები დაახლოვდეს. ჩვენი სურვილია, რომ პოზიციები დაახლოვდეს, შეთანხმება შედგეს და კრიზისი განიმუხტოს, ოღონდ ბურთი, რა თქმა უნდა, არის ხელისუფლების მხარეს”. – თქვა დავით ბაქრაძემ შეხვედრის დაწყებამდე.
“ლეიბორისტული პარტიის” ლიდერიც თვლის, რომ ძალიან მძიმე პოლიტიკური კრიზისიდან საქართველოს გამოსვლის გზა ახალ საპარლამენტო არჩევნებზე გადის.
როგორც შალვა ნათელაშვილმა ადგილზე შეკრებულ მედიას უთხრა, “სხვა შემთხვევაში ხელისუფლებამ ამ წარმონაქმნს რომის სენატიც რომ დაარქვას, ამით არაფერი შეიცვლება”.
„რაც ადრე აღიქვამს ამას ბიძინა ივანიშვილის ოლიგარქიული ნეირონები და მისი გარემოცვა, რომ ახალი არჩევნების გარეშე ვერ გადაურჩებიან ქართველი ხალხის რისხვას და მათ მოუწევთ პოლიტიკური კოცონი, მით უკეთესი იქნება მათთვის და ქვეყნისთვის. ერთხელ არ დათანხმდებიან, მეორედ არ დათანხმდებიან, მესამედ დაჭკვიანდებიან და დათანხმდებიან“, – განაცხადა შალვა ნათელაშვილმა და იქვე დასძინა, რომ ქვეყანაში მაშინ იქნება დემოკრატიული არჩევნები, როდესაც აღარ იარსებებს მუდმივი ცენტრალური საარჩევნო კომისია გადაქცეული სუპერ სამინისტროდ, მილიონი დაფინანსებით, ჩამოყალიბებული გამყალბებელთა ბიუროკრატიით, რომელთა მიზანია შეკვეთების შესრულება.
ალეკო ელისაშვილი კი ამბობს, რომ “ქართული ოცნება” დათმპობაზე უნდა წამოვიდეს:
“უნდა დათმოს ქართულმა ოცნებამ მნიშვნელოვანი რაღაცები. მაშინ მოლაპარაკებას საერთოდ აზრი არ ექნებოდა, მაშინ არც ჩვენ უნდა ვწვალობდეთ, არც ქართული ოცნება და არც ელჩები. შეიძლება დავიშალოთ ისე, რომ ვერანაირ შეთანხმებას ვერ მივაღწიოთ, მაგრამ გარკვეული იმედი არის, რომ შეთანხმებას მივაღწევთ. გარკვეული კომპრომისები არის, არასაკმარისი. დანარჩენს სულ ცოტა ხანში გავიგებთ”. – აცხადებს შეხვედრის დაწყებამდე ელისაშვილი.
„სტრატეგია აღმაშენებლის“ ლიდერი, გიორგი ვაშაძე კი ამბობს, რომ საუბარი რაიმე კომპრომისზე ჯერ ადრეა.
მისი თქმით, “ამ შეხვედრით რომ არ დამთავრდება ყველაფერი, ეს ფაქტია, ეს ილუზია იმედია, არავის აქვს”.
როგორც გიორგი ვაშაძემ აღნიშნა, ელჩებთან დღევანდელ შეხვედრაზე სხვადასხვა საკითხებთან დაკავშირებით იქნება საუბარი.
„ყველაფერს გეტყვით, როცა გამოვალ შეხვედრიდან, ყველაფერი დამოკიდებულია დღევანდელ შეხვედრაზე. გვექნება ბევრ საკითხზე საუბარი, თუმცა რაიმე კომპრომისზე ჯერ ადრეა, ამ შეხვედრით რომ არ დამთავრდება ეს ფაქტია. ეს ილუზია იმედია, არავის აქვს“, – განაცხადა გიორგი ვაშაძემ.
ცნობილია, რომ 4 დეკემბერს ოპოზიციამ ფასილიტატორ ელჩებს წერილობითი ფორმით წარუდგინა ის მოთხპოვნები, რომელსაც კონსოლიდირებული ოპოზიცია აყენებს:
რიგგარეშე არჩევნების ჩატარება, ცესკოს ადმინისტრაციის შეცვლა, პოლიტპატიმრების გათავისუფლება და რიგგარეშე არჩევნების დანიშვნის შესახებ პლებისციტის დანიშვნაა.
კომენტარები