კორონავირუსით სენაკელი კაცი გარდაიცვალა. სამეგრელო-ზემო სვანეთის რეგიონის სახელმწიფო რწმუნებულის მოვალეობის შემსრულებლის, მალხაზ თორიას ინფორმაციით, პაციენტს გულ-სისხლძარღვთა დაავადებები ჰქონდა და ის კლინიკა „რქიმედეში“ მკურნალობდა.
დღეს რეგიონის მასშტაბით, კორონავირუსის 58 ახალი შემთხვევა გამოვლინდა. მათგან 36 შემთხვევა ზუგდიდს უკავშირდება. ინფიცირებულებს შორის არიან, სკოლის პედაგოგები, ბაღის აღმზრდელები, რომლებიც უკვე დადასტურებული შემთხვევის კონტაქტები არიან.
მალხაზ თორიას განცხადებით, მიმდინარეობს კონტაქტების მოძიება და ღრმა ეპიდკვლევა. მისივე განმარტებით, რეგიონში სიტუაცია კონტროლირებადია და ამ ეტაპზე ზომების გამკაცრება არ იგეგმება. ვირუსის საპრევენციო ღონისძიებების ფარგლებში, მუნიციპალიტეტებში 24-საათიან რეჟიმში, სადეზინფექციო სამუშაოები მიმდინარეობს.
რუხის კლინიკაში, მოთავსებულია 114 კოვიდინფიცირებული. მათგან 15 პაციენტის მდგომარეობა შედარებით მძიმეა, რადგან მათ თანმხლები დაავადებები აქვთ.
რეგიონის მასშტაბით, საკარანტინო სივრცეებში მოთავსებულია 232 ადამიანი.
დღე-ღამეში საქართველოში კორონავირუსი კიდევ 1 186 ადამიანს დაუდასტურდა, 278 პაციენტი გამოჯანმრთელდა, 7 კი გარდაიცვალა.
ამ დროისთვის საქართველოში კორონავირუსის 18 663 შემთხვევაა დადასტურებული, გამოჯანმრთელებულია 8338 ადამიანი, გარდაიცვალა 143 პაციენტი.
კარანტინის რეჟიმში 6300 ადამიანი რჩება, სტაციონარში მეთვალყურეობის ქვეშ – 836, კოვიდ-სასტუმროში – 1388, უცხოეთიდან სამკურნალოდ გადმოყვანილია საქართველოს 41 მოქალაქე.
კომენტარები