დღეს, როცა ინფიცირების 919 შემთხვევა გვაქვს, უკვე დაიწყო იმის განხილვა, შემოიღებს თუ არა პრემიერი საგანგებო მდგომარეობას ამ კომენდანტის საათს.
იურისტების ნაწილი ამბობს, რომ ხელისუფლება კომენდანტის საათს ვერ შემოიღებს საგანგებო მდგომარეობის გარეშე, საგანგებო მდგომარეობას თუ დააწესებს – მას არჩევნების გადადება მოუწევს.
უპს, ბატონ იურისტებს ერთი მნიშვნელოვანი დოკუმენტი ავიწყდებათ, რომელიც ხელისუფლებამ “ალიას” პროტესტის ფონზე მაინც მიიღო ამა წლის მაისის ბოლოს 15 ივლისამდე და 14 ივლისს კი 1 იანვრამდე გააგრძელა, ეს გახლავთ ცვლილებები კანონში, საზოგადოებრივი ჯანდაცვის შესახებ.
ცვლილებები წინააღმდეგობაში მოდის კონსტიტუციასთან და მაშინ “ალიამ” მას უწოდა კიდეც – საკანონმდებლო დიქტატურა! ამ კანონის ცვლილების მიხედვით, განისაზღვრა, რა დამატებითი უფლებები მიენიჭა პრემიერს საგანგებო მდგომარეობის შემოღების გარეშე.
ასე რომ, ბატონებო და ქალბატონებო, ხელისუფლებას მხოლოდ იმ შემთხვევაში შეუძლია არჩევნების გადადება, თუ მას ამის დაუძლეველი სურვილი გაუჩნდა, სხვა მხრივ, სრულიად თავისუფლად შეუძლია, საგანგებო მდგომარეობა არ გამოაცხადოს, მაგრამ შეგვზღუდოს ისე, როგორც სურს და არც არჩევნები გადადოს. პირიქით, მეტი და მეტი გადასატანი ყუთი გამოიყენოს შეუძლია კარანტინში, კიდევ ერთი ახალი რეგულაციის წყალობით.
სწორედ ამიტომ ამახვილებს ყურადღებას ე.წ. წერტილოვან შეზღუდვებზე, სწორედ ამისთვის მოემზადა მაისში!
ახლავე წვრილად გაგახსენებთ, რისი შეზღუდვა შეუძლია პრემიერს:
განსაზღვროს იზოლაციის წესი (ვინ, სად, როდის და რამდენი ხნით განათავსოს)
საკარანტინო ღონისძიებები − ღონისძიებათა ერთობლიობა, რომელიც გამოიყენება იმ პირის მიმართ, რომელიც არ არის ავად, მაგრამ ჰქონდა ექსპოზიცია გადამდები დაავადების შემთხვევასთან გადამდებლობის პერიოდის განმავლობაში.
ღონისძიებები, რომელიც გულისხმობს საჯარო დაწესებულებების საქმიანობის,
პირთა მიმოსვლის,
საკუთრების,
შრომის,
პროფესიული ან ეკონომიკური საქმიანობის,
უკანონომიგრაციის/საერთაშორისო დაცვის,
ფიზიკურ პირთა სოციალური ღონისძიებების ჩატარების მიზნით თავშეყრის კანონმდებლობისგან განსხვავებულად მოწესრიგებას,
მათ შორის შესაბამისი შეზღუდვების დაწესებას, რომელიც აუცილებელია მოსახლეობის ჯანმრთელობის დასაცავად.
სისხლის სამართლის საპროცესო კოდექსში შედის ცვლილება, რომლის მიხედვითაც, პირს არა აქვს მოითხოვოს ფიზიკური დასწრება პროცესზე, თუ მოსამართლე გადაწყვეტს, რომ სხდომა დისტანციურად უნდა ჩატარდეს.
რაში სჭირდება საგანგებო მდგომარეობის შემოღება, როცა შეუძლია მიმოსვლის, საკუთრების, შრომის, ეკონომიკური საქმიანობის უფლების შეზღუდვა, საგანგებო მდგომარეობის შემოღების გარეშე?
ქალაქის ჩაკეტვა შეუძლია? – შეუძლია
შეუძლია, ქალაქიდან გასვლა აგიკრძალოს? – შეუძლია
ტრანსპორტის გაჩერება შეუძლია? – შეუძლია
მაღაზიების, სავაჭრო ცენტრების, სილამაზის სალონების, ბაზრების დაკეტვა შეუძლია? – შეუძლია
შეუძლია რესტორნები დაკეტოს რაღაც საათის შემდეგ? – კი, უკვე დაკეტა 22 საათის შემდგომ.
შეუძლია საერთოდ დაკეტოს რესტორნები, ბარები, სასტუმროები? – კი, შეუძლია
შეუძლია, აფთიაქებს დაუწესოს სამუშაო საათები? – შეუძლია
შეუძლია აკრძალოს 3 პირზე მეტი ადამიანის შეკრება? – შეუძლია.
შეუძლია ღია სივრცეშიც გაიძულოს პირბადით სიარული? – შეუძლია
რა არ შეუძლია?
და რატომ უნდა გამოაცხადოს საგანგებო მდგომარეობა? დაკეტავს, გააჩერებს ყველაფერს თუ დასჭირდა და იარე კორპუსის წინ, რამდენიც გინდა. შეხვდები მეგობრებს? – დაგაჯარიმებს. შეიკრიბები? – დაგაჯარიმებს. ასე რომ სიარულიც მარტოს მოგიწევს.
“ალია” დაუკავშირდა იურისტ გურამ კონტუაძეს, რომელიც გვიყვება, რომ მხოლოდ იურიდიულ ტერმინებშია განსხვავება, თორე, ტექნიკურად, მთავრობას, ყველა იმ შეზღუდვის შემოღება შეუძლია (სხვა სახელით, მიმოსვლის უფლების აკრძალვით, მაგალითად), რისი შემოღებაც საგანგებო მდგომარეობის პირობებში შეეძლო, ამის დასტურია, ბათუმი და სვანეთი, სადაც გამოიყენეს შეზღუდვები, ამის დასტურია, რესტორნების დაკეტვა 22 საათის შემდეგ და ა.შ.
ასე რომ, ძვირფასო იურსტებო, მაისში და ივლისში, როგორც მახსოვს, მხოლოდ რამდენიმეს პროტესტი გვესმოდა, ახლა კი გვიანია იმაზე საუბარი, რამდენის უფლება მივეცით მთავრობას, აი, იმის მტკიცება კი, რომ შეზღუდვებს საგანგებო მდგომარეობის გამოცხადების გარეშე ვერ შემოიღებს – უაზრობაა. არ გამოაცხადებს საგანგებო მდგომარეობას, შემოიღებს შეზღუდვებს და არჩევნებსაც ისე ჩაატარებს, როგორც მოესურვება!
ხო, დღეს კიდევ ერთი საარჩევნო დაპირება გააჟღერა პრემიერმა – 1 იანვრიდან პირდაპირი ფრენები აღდგება ევროპასთან და ეკონომიკა ამოისუნთქებს, თქვენ კი მეტად დასაქმდებითო! დიდი ალბათობით, ამ ციფრებით, ევროპის ქალაქები ჩვენთან ფრენაზე უარს იტყვიან, მაგრამ დაპირება კარგად ჟღერს! მართალია, დღეში 20 ინფიცირებულის ფონზე ავკრძალეთ ფრენა და მთელი ზაფხული ვიშიმშილეთ, მაგრამ 1 ნოემბერი სულ სხვაა!
კომენტარები