11 აგვისტოს ბათუმში, “ორბი თაუერსის” ერთ-ერთი კომპლექსის მეოცე სართულიდან 25 წლის ლაშა კუხიანიძე გადმოვარდა. უბედური შემთხვევა გამთენიისას მოხდა.
ლაშა ბათუმის ილია ჭავჭავაძის სახელობის დრამატული თეატრის მსახიობი გახლდათ. ის ქუთაისელი იყო და თავის ქუთაისელ მეგობართან ერთად თეატრის მსახიობის, ტიტე კომახიძის სახლში ცხოვრობდა.
ლაშამ 8 აგვისტოს იქორწინა. ბობოყვათში ხელი მარიამ ჩხარტიშვილთან მოაწერა. წყვილს, “ორბი თაუერსის” მეოცე სართულზე, აპარტამენტი, ოთხი დღით ჰქონდა დაქირავებული. 11 აგვისტოს კი უბედური შემთხვევა დატრიალდა…
“პრაიმტაიმს” თავის გარდაცვლილ მეგობარზე მომღერალი ნიკო ბერიძე უყვება. ნიკოს კარგად იცნობთ კოტეს როლით გახმაურებული მიუზიკლიდან “ქეთო და კოტე”, რომელიც 2011 წელს ბათუმის ხელოვნების ცენტრში დავით დოიაშვილმა დადგა. ნიკოს პარტნიორობას სოფო ნიჟარაძე უწევდა.
ნიკომ გარდაცვლილი მეგობრისგან გამოგზავნილი უკანასკნელი მონაწერის “სქრინი” გამოაქვეყნა, სადაც ლაშა თავის ხელის მოწერაზე ეპატიჟება ნიკოს. “ნიშნობაზე ვერ მოვედი და ისე გამიკეთე, რომ შენს გასვენებაში უნდა მოვიდე” – აწერს მიმოწერას ბერიძე.
სამწუხაროდ, ნიკო მეგობრის ბედნიერების დღეს მის გვერდით არ იყო. ჩვენთან საუბარში კი დანანებით ამბობს, რომ უნდა წასულიყო…
ნიკო ბერიძე: – ეს ჩემ პირადი პრობლემა იყო, რატომ ვერ წავედი. მეორე დღეს ვიფიქრე, რატომ არ უნდა წავსულიყავი-მეთქი? უნდა წავსულიყავი…
ლაშა კუხიანიძე ჩემი “ლუბიმჩიკი” მეგობარი იყო… ბელის ვეძახდით. დრამატულ თეატრში გავიცანი. მაშინ მისი მეგობარი, ასევე ქუთაისელი თორნიკე ბარამიძე თეატრალურის სტუდენტი იყო და ლაშა მასთან ჩამოვიდა ბათუმში. მაშინვე ჩემი “ლუბიმჩიკი” გახდა. ლაშა და თორნიკე, თოთი, განუყრელი მეგობრები იყვნენ. უერთმანეთოდ ვერც ერთი ვერ წარმომედგინა. ახლა რას განიცდის თორნიკე, წარმომიდგენია…
ვგიჟდებოდი ისე მიყვარდა, გაცნობის დღიდან. მე და აჩიკო გოგიტიძე სადაც კი მივდიოდით, ლაშას სულ თან დავატარებდით. მუდამ მომღიმარი იყო. ჰქონდა არაჩვეულებრივი იუმორი. ნიჭიერი მსახიობი იყო. საერთოდ, უნიჭიერესი კაცი იყო!
ერთადერთი იყო, ვისი დანახვაც ცუდ ხასიათზე ყოფნის დროს (მაშინ, როდესაც ამ დროს არავის ნახვა არ მსურს) აბსოლუტურად მავიწყებდა ყველა ნეგატივს. გამოჩნდებოდა თუ არა, იქვე მთავრდებოდა ჩემი ცუდი ხასიათიც.
ერთხელ ერთ ბარში შევედი, ცუდ ხასიათზე და გადაღლილი. თურმე იქ იყო ბარმენად, არ ვიცოდი, სიურპრიზად ვნახე. გამიხარდა… რა გჭირს ბიჭო, სახეზე გაწერია – “ვერ ვარო”, მკითხა. რა ვიცი-მეთქი. მე იცი, როგორი ბარმენი ვარო? კლიენტები რომ გულს უშლიან ისეთი კი არა, აქეთ რომ ტვინს უბურღავს ბარში შემოსულს და თავის პრობლემებზე ელაპარაკებაო… მაშინვე გავხალისდი.
19 წლის იყო ქუთაისიდან რომ ჩამოვიდა ბათუმში და მალევე გახდა ბათუმელების საყვარელი ბიჭი. ჩააბარა თეატრალურში, დაამთავრა და ბათუმის თეატრის მსახიობი იყო. ჰქონდა წარმატებული როლები.
26 აგვისტოს, თავის ოქროს დაბადების დღეზე, პრემიერა უნდა ეთამაშა…
ლაშა და თორნიკე ბათუმის დრამატული თეატრის ერთ-ერთი წამყვანი მსახიობის, ტიტე კომახიძის სახლში ცხოვრობდნენ. ორივე შვილივით უყვარდა ტიტეს.
ლაშაზე დაუსრულებლად შემიძლია ვილაპარაკო. არ მჯერა, მაგრამ რომ ვაანალიზებ, შემომაწვება და ვერ გეტყვით, რა ხდება ჩემში…
პრაიმტაიმი
კომენტარები