რატომ ეძებდა პოლიცია “ნასვამ“ შაქარაშვილს?- ჩვენება

მიუხედავად იმისა, რომ 19 წლის ფეხბურთელის, გიორგი შაქარაშვილის გაუჩინარებიდან რამდენიმე საათში, დილის 7 საათისათვის, ოჯახმა უკვე იცოდა, რომ ბიჭის გაუჩინარება მცხეთის აგარაკზე მომხდარ დაპირისპირებას მოჰყვა, პოლიციაში განცხადება, მხოლოდ და მხოლოდ, „ნასვამი“ გიორგი შაქარაშვილის დაკარგვის შესახებ შევიდა.

განცხადების ინიციატორია გიორგი შაქარაშვილის მეზობელი. 19 წლის ფეხბურთელის გაუჩინარების შესახებ პოლიციას მან გიორგი შაქარაშვილის დედის თხოვნით მიმართა.

მეზობლის გამოკითხვის ოქმის თანახმად, რომელიც პირველი ივლისით თარიღდება, გიორგი შაქარაშვილის გაუჩინარების შესახებ მან დილით, 7 საათისათვის შეიტყო. მან ისიც შეიტყო, რომ გიორგის კვალი მცხეთაში მომხდარი დაპირისპირების შემდეგ გაუჩინარდა.

თუმცა, საქმეში დევს პოლიციაში შესული შეტყობინების დოკუმენტი, სადაც წერია, რომ „ერთ-ერთი მოქალაქე, გიორგი შაქარაშვილი, რომელიც ნასვამ მდგომარეობაში იყო, დაიკარგა. მდინარის პირას, ხევია, ასევე ტყე გარშემო. შესაძლოა, ხევში გადავარდა ან ტყეშია, არ იციან ზუსტად“. შეტყობინებაში არაფერი წერია 19 ივნისის ღამის ინციდენტის შესახებ.

გიორგი შაქარაშვილის მეზობლის გამოკითხვის ოქმში ვკითხულობთ:

„19 ივნისს, დაახლოებით 7 საათზე მე გამაღვიძა ხმაურმა და როდესაც გავიღვიძე, ხმა მოდიოდა ჩემი საცხოვრებელი ბინის ერთი სართულით ქვემოდან, გიორგი შაქარაშვილის საცხოვრებელი ბინიდან. მე მაშინვე ჩავიცვი და ჩავედი გიორგი შაქარაშვილის ბინაში, სადაც დამხვდნენ მისი ოჯახის წევრები, რომლებიც იყვნენ აღელვებულები და ამბობდნენ, რომ გიორგი წვეულებიდან არ იყო დაბრუნებული. ასევე მითხრეს, რომ აღნიშნულ წვებულებაზე მოხდა ჩხუბი, რაზედაც მე და მისი ოჯახის წევრები წამოვედით მცხეთაში, ნარეკვავის დასახლებაში მდებარე ერთ-ერთ აგარაკზე, ვიფიქრეთ, იქ იქნებოდა. როდესაც მივედით, ვნახეთ, რომ აგარაკზე არავინ იყო. ვინაიდან გიორგი ვერ ვიპოვეთ ჩვენი ძალებით, მისი დედის თხოვნით, დავრეკე 112-ზე და ვითხოვე პოლიციისა და სამაშველო სამსახურის დახმარება“.

საქმის მასალების თანახმად, გიორგი შაქარაშვილის ოჯახმა ბიჭის ძებნა მას შემდეგ დაიწყო, რაც დილის 7 საათისათვის მათ მობილურზე დაუკავშირდა გიორგი შაქარაშვილის მეგობარი და საქმის ერთ-ერთი მთავარი მოწმე, გურამ ამირხანაშვილი და იკითხა, დაბრუნდა თუ არა გიორგი სახლში.

შეატყობინა თუ არა მან ოჯახს ინციდენტის დეტალები, ამის შესახებ ამირხანაშვილის გამოკითხვის ოქმებში არაფერი წერია.