როსსელხოზნადზორის ცნობით, 2-6 ნოემბერს მათი დელეგაცია საქართველოში სურსათის ეროვნული სააგენტოს მიწვევით იმყოფებოდა.
რუსეთის ვეტერინარული და ფიტოსანიტარიული ზედამხედველობის სამსახურმა 9 ნოემბერს განაცხადა, რომ მისმა სპეციალისტებმა ქართული ლაბორატორიების აუდიტი ჩაატარეს და გაეცნენ, როგორ გასცემს საქართველო რუსეთში საექსპორტოდ განკუთვნილ თესლოვან და კურკოვან ხილზე ფიტოსანიტარიულ სერტიფიკატებს.
რუსული უწყების ინფორმაციით, დელეგაციამ სოფლის მეურნეობის სახელმწიფო ლაბორატორიაში შეაფასა, როგორ ამოწმებენ მცენარეულ პროდუქტებში პესტიციდებისა და აგროქიმიკატების ნარჩენ შემცველობას.
რუსი სპეციალისტები გაეცნენ კვლევის მეთოდებს, შეამოწმეს აღჭურვილობა და შეაფასეს თანამშრომელთა კვალიფიკაცია. როსსელხოზნადზორის ცნობით, უწყება ლაბორატორიას აუდიტის აქტს გაუგზავნის.
ამასთან, რუსეთიდან ჩამოსულმა დელეგაციამ გორის მუნიციპალიტეტში ხილის მოყვანის, შენახვისა და საექსპორტო პარტიების მომზადების ხუთი ობიექტიც მოინახულა.
როსსელხოზნადზორის ცნობით, ქართულმა მხარემ დელეგაციას აცნობა, რომ მცენარეთა კარანტინის ეროვნულ სისტემას ამუშავებს. რუსული უწყების შეფასებით, ორი ქვეყნის ციფრული პლატფორმების დაკავშირება ინფორმაციის გაცვლას გაამარტივებს და ფიტოსანიტარიულ კონტროლს დაქვემდებარებული პროდუქციის ორმხრივ მიწოდებას გაზრდის.
კომენტარები