“ნათია ჯანაშიამ მრავალმილიონიანი სასახლე-ვილების კოლექცია დააგროვა”

“სულ ახალხანს ცნობილი გახდა “ბრიტანულ-ქართული აკადემიის” მინორიტარი აქციონერის(30%), ნათია ჯანაშიას კიდევ ერთი მრავალმილიონიანი აქტივის არსებობის შესახებ. ეს ფაქტი მის მთლიან აქტივებს საგრძნობლად ზრდის და კიდვ უფრო აახლოებს მას ქართველ მილიონერთა პირველ ასეულთან, ანუ იმ სიასთან, სადაც 100 მილიონი ლარის მფლობელი ქართველი ბიზნესმენები არიან თავმოყრილი”, – აცხადებენ “ახალგაზრდა ფინანსისტთა და ბიზნესმენთა ასოციაციის” – აფბას აუდიტისა და მონიტორინგის სამსახურში. შეგახსენებთ, აფბა “ბრიტანულ-ქართული აკადემიის” გარშემო მიმდინარე ბიზნესდავის საზოგადოებრივ მონიტორინგს ახორციელებს.

ასოციაციის მონიტორთა თქმით, ცნობილი გახდა ნათია ჯანაშიას და მისი ქმრის, დავით ცეცხლაძის საკუთრებაში არსებული 3820 კვადრატული მეტრის საცხოვრებელი ფართის მქონე მშენებარე სასახლის თაობაზე, რომელიც ლისის მიმდებარედ, მაგნოლიას ქუჩაზე არის განთავსებული.

“ამ დღეებში გავრცელებული დადასტურებული მონაცემების თანახმად, დავით ცეცხლაძის სახელზე დარეგისტრირებულია 3 820 კვადრატული მეტრისსაცხოვრებელი ფართი, რომელიც პრაქტიკულად ბოლომდეა აშენებული და სადაც მხოლოდ მოსაპირკეთებელი სამუშაოებია ჩასატარებელი. ჩვენი ინტერესის საგანი გახდა ამ აქტივის საბაზრო ფასის დადგენა, რათა განგვესაზღვრა ამ სიახლის ფონზე რამდენი მილიონი ლარით წაიწია წინ ნათია ჯანაშიამ ქართველ მილიონერთა სიაში”, – აცხადებენ აფბაში.

ორგანიზაციის აუდიტორების თქმით, იმ არეალში, სადაც ეს უზარმაზარი სასახლე არის აგებული, 1 კვადრატული მეტრი გარემონტებული საცხოვრებელი ფართის საბაზრო ფასი 2000–დან 3000 აშშ დოლარამდე მერყეობს. ფასი დამოკიდებულია კონკრეტულ ადგილმდებარეობასა და რემონტის ხარისხზე.

“მიუხედავად იმისა, რომ ნათია ჯანაშიას მაგნოლიას დიდი სასახლის ადგილმდებარეობაც საუკეთესოა, დაგეგმილი რემონტის მასალების ხარისხიც უზადო და პლუს ნაგებობა, მასში განსათავსებელი ინფრასტრუქტურის (მინი ფეხბურთის დახურული მოედანი, 2 აუზი, შიდა კინოთეატრი, ბოულინგის დარბაზი და სხვ) ხასიათითაც უნიკალურია, ჩვენ მაინც ერთობ მოკრძალებულად – ყველაზე მინიმალურ ფასად, 2000 აშშ დოლარად შევაფასეთ ამსასახლის 1 კვადრატული მეტრის საბაზრო ფასი. შესაბამისად, მისი მთლიანი რემონტის შემდგომი ღირებულება მინიმუმ 7 მილიონ 650 ათასი აშშ დოლარი იქნება. ეს დაახლოებით 20 მილიონი ლარია. საგულისხმოა, რომ იგივე საფასო სეგმენტში განიხილავენ გამოცდილი რიელტორები ამ სასახლის გასხვისების შესაძლებლობას, თუკი ასეთი სურვილი მის მეპატრონეებს გაუჩნდებათ.

შესაბამისად, ძალიან მარტივად, ჩვენ შეგვიძლია დავასკვნათ, რომ თუკი ამ უძრავი ქონების – მაგნოლიას დიდი სასახლის “აღმოჩენამდე” ნათია ჯანაშიას დათვლილი აქტივები 60 მილიონ ლარს აჭარბებდა, ახლა იგი უკვე 80 მილიონს გადააჭარბებს”, –ამბობენ აფბას მონიტორები.

შეგახსენებთ, აფბას აუდიტორებმა რამდენიმე თვის წინ გამოითვალეს ნათია ჯანაშიას აქტივები.

მათ პირველ რიგში, გაითვალისწინეს „ბრიტანულ-ქართული აკადემიის“ 70%-ის გაყიდვის შედეგად მიღებული 29.3 მილიონი ლარი და დარჩენილი 30%-იანი წილის ღირებულება, რომლის გამოსყიდვის შეთავაზებაც 2024 წელს „საქართველოს განათლების ჯგუფს“ აქვს გაკეთებული.

წილის ღირებულების დადგენისთვის გამოიყენეს მონაცემები, რომელიც სახელმწიფო ანგარიშგების პორტალზეა განთავსებული და მოიცავს „ბრიტანულ-ქართული აკადემიის“ პროფილს და ანგარიშგებას წლების მიხედვით.

გარდა ამ მონაცემებისა, ნათია ჯანაშიას ქონებისა და აქტივების დათვლისთვის აფბამ გამოიყენა სამხარაულის ექსპერტიზის ეროვნული ბიუროს დასკვნა, რომლის ფინანსური ნაწილიც მიმდინარე წლის თებერვალში გამოქვეყნდა და გასაჯაროვდა და შეიცავს „ბრიტანულ-ქართული აკადემიის“ ღირებულების შეფასების მეთოდოლოგიასა და ასევე კონკრეტულ მონაცემებს.

აქტივების დათვლაში გარკვეულწილად გათვალისწინებული იყო ასევე ნათია ჯანაშიას უძრავ-მოძრავი ქონება, რომელიც აფბას მიერ მონიტორინგის პერიოდში ნათია ჯანაშიას განცხადებებში და მის საკუთრებაში არსებულ გამოცემებშია ნახსენები.

კონკრეტულად, იმ პერიოდისთვის, ამ ჩამონათვალში მოხვდა ნათია ჯანაშიას და მისი მეუღლის სახელზე რეგისტრირებული უძრავი ქონება, მოძრავი ქონებაც – კერძოდ, ძვირადღირებული, ლაქშერი კლასის ავტომანქანები, იახტები (კატარღები) და იარაღები. თუმცა, ჩამონათვალის არაერთგვაროვნების გამო, გარკვეული ნაწილი, რომელიც თავდაპირველად ასახული იყო ქონებაში, ვერ მოხვდა საბოლოო სიაში.

საბოლოო ჯამში, არსებული დაზუსტებული მონაცემებით, გამოირკვა, რომ აღნიშნული კვლევის განხორციელების პერიოდისთვის ნათია ჯანაშიას ქონება და აქტივები 60 მილიონ ლარს აჭარბებდა.

შესაბამისად, 20 მილიონიანი უძრავი ქონების დამატების შედეგად, ნათია ჯანაშიას მთლიანმა აქტივებმა 80 მილიონ ლარს გადააჭარბა.

აფბა აგრძელებს მონიტორინგს და საზოგადოებას მივაწვდით ინფორმაციას, რომელიც დაფუძნებული იქნება მხოლოდ ღია წყაროებზე და შეესაბამება მონაცემთა მოპოვების გამჭვირვალობის უმაღლეს სტანდარტს.