გამოცემა El Mundo-ს ცნობით, აშშ-ს დაზვერვამ მოიპოვა ინფორმაცია, რომ რუსეთი ესპანეთის, საფრანგეთის ან იტალიის წინააღმდეგ დრონებით შესაძლო თავდასხმას ამზადებს. გამოცემის თანახმად, ვაშინგტონმა ინფორმაცია რამდენიმე ევროპულ მთავრობას უკვე გაუზიარა.
El Mundo წერს, რომ შესაძლო ოპერაცია სავაჭრო გემებიდან მცირე ზომის “გერბერას” ტიპის დრონების გაშვებას მოიცავს.
“ისინი ზღვიდან, გემის კონტეინერში დამალულ დრონებს გაუშვებენ – ეს საერთოდ არ არის რთული.” – განუცხადა გამოცემას ლიტვის თავდაცვის სამინისტროსთან დაახლოებულმა ანონიმურმა წყარომ.
El Mundo ასევე წერს, რომ ევროპის ქვეყნების მთავრობებს შორის აშშ-ს ცენტრალური საადაზვერვო სააგენტოს (CIA) ანგარიში გავრცელდა, რომელშიც შესაძლო თავდასხმის სცენარი დეტალურად არის აღწერილი.
სტატიაში აღნიშნულია, რომ რუსეთმა შესაძლოა, დაახლოებით 600-კილომეტრის რადიუსის მქონე “გერბერას” ტიპის დრონები გამოიყენოს. მცირე ზომის ფეთქებადი მუხტის გამო მსგავსი აპარატები დიდი ობიექტის განადგურებისთვის ნაკლებად გამოსადეგია, თუმცა, მათი გამოყენება შესაძლებელია ხანძრის გამოწვევის, მოწყობილობების დასაზიანებლად, ან აეროპორტისა თუ პორტის მუშაობის დროებით შესაფერხებლად.
ბრიტანელი სამხედრო ანალიტიკოსის, კირ ჯაილსის შეფასებით, რუსეთის სამიზნე აუცილებლად NATO-ს აღმოსავლეთ ფლანგზე მდებარე ქვეყანა არ იქნება და მოსკოვმა შესაძლოა, პოლიტიკური ან თავდაცვის თვალსაზრისით ევროპის ყველაზე მოწყვლადი სახელმწიფო შეარჩიოს.
El Mundo-ს მიერ გავრცელებული ინფორმაცია ოფიციალურად არც აშშ-ს და არც დასახელებული ევროპული ქვეყნების ხელისუფლებებს არ დაუდასტურებიათ.
კომენტარები