“‘მერე ფულის ხამი გამოაცურეს თავისი დამპალი ნავით და ახლა რუსეთის აგენტის ჯერიც დადგა” – რომან გოცირიძე

ეროვნული ბანკის ყოფილი დირექტორი, რომან გოცირიძე;

ბოლო ერთი თვეა, რაც სახელისუფლებო მედია და დაქირავებული ბობოლა პროპაგანდისტები ორგანიზებულ შეტევას ახორციელებენ ჩემზე. როგორც ჩანს, ეს ივანიშვილის დავალებაა. ის, რასაც ვამბობ და რასაც ვწერ, ხელისუფლებისთვის საშიშად ჩათვალეს.

ჯერ იყო და მოფილოსოფოსო მსახურმა, ზაზა შათირიშვილმა მომიძღვნა ვრცელი წერილი. ასეთი რამ რომ ივანიშვილის დავალების გარეშე არ ხდება, ნათელია. მთელი დღე ატრიალა თურმე ხელოვნური ინტელექტის მიერ შექმნილი ეს პასკვილი ქოცმედიამ. მერე იყო და „უცნობად“ წოდებული, ფულის ხამი გია გაჩეჩილაძე გამოაცურეს თავისი დამპალი ნავით და უნიჭო კლიპები მომიძღვნა. აგერ, ახლა რუსეთის აგენტის, მალხაზ გულაშვილის ჯერიც დადგა: „ჯორჯიან თაიმსის“ ეთერში ის, შევარდნაძისდროინდელი კორუმპირებული ირაკლი გოგავა და ხარაბუზა ექსპერტი, ვინმე ზურა მანჯავიძე მომდგნენ და მლანძღავენ.

გავიხსენოთ, ვინ არის მალხაზ გულაშვილი: წინა ხელისუფლების დროს მასზე სისხლის სამართლის საქმის აღძვრის შემდეგ, კრემლელმა მფარველებმა ცხინვალის გავლით მოსკოვში გააპარეს. მანამდე, 2010 წელს, აგვისტოს ომის შემდეგ ერთ-ერთ კონფერენციაზე შეხვდა რუსეთის პრეზიდენტ მედვედევს და სისხლიან ხელებში მისი „წიგნად“ წოდებული ნაჯღაბნი გადასცა. რუსებსა და ქართველებს შორის სულიერ ერთობასა და ისტორიულ მეგობრობას გაუსვა ხაზი და დაუდასტურა თავისი აგენტურული მორჩილება.

ჰოდა, ამ ორ დიდ ლაქიასა და მალხაზ გულაშვილისნაირ მრავალ სხვა რიგით ჭიაღუა ლაქიას სამიზნეში ვყავარ ამოღებული ბოლო პერიოდში (არც მანამდე მაკლებდნენ).

ეს არის კარგად დაგეგმილი კამპანია.

მაშინ, როცა შინაგან საქმეთა სამინისტროს რაღაც ქვედანაყოფი (რომლის სახელიც კი არ ვიცი და ხალხი დაცინვით „სქროლვის სამინისტროს“ ეძახის) სრულიად უწყინარი გამონათქვამებისათვის აჯარიმებს ხალხს, რატომ არაფერს მიმართავს ჩემს მიმართ სოცმედიაში არაერთხელ გამოთქმული შეურაცხმყოფელი სიტყვების გამო? ეს გაყიდული მალხაზა ეთერში რომ შეურაცხყოფას მაყენებს, რატომ არ რეაგირებენ? რუსეთის შიშით თუ ივანიშვილის მომსახურე ლაქია პროპაგანდისტის სტატუსის გამო?

ერთი რამ კი მინდა ვთქვა: მიმაჩნია, რომ საჯარო სივრცეში გაჟღერებული თუნდაც მწვავე, შეურაცხმყოფელი თუ მიუღებელი განცხადებები გამოხატვის თავისუფლების ნაწილია და მათი გამო სამართალდამცავი ორგანოების მხრიდან მოქალაქეთა დევნა სრულიად დაუშვებელია. დემოკრატიულ საზოგადოებაში პოლიტიკოსები უნდა ითმენდნენ განსაკუთრებულად მაღალ კრიტიკას, ხოლო გამოხატვის თავისუფლების შეზღუდვა ან მისი სამართლებრივ ჭრილში გადატანა გაცილებით დიდ საფრთხის შემცველია, ვიდრე ნებისმიერი პირადი შეურაცხყოფა-თუნდაც „ჯორჯიან თაიმსის“ ეთერიდან სამი უზნეო პირის ბჟუტური.